भांगरभूंय | प्रतिनिधी
पेडणें: सनबर्न महोत्सव धारगळे जालो. ह्या महोत्सवाक पेडणेंचे आमदार प्रवीण आर्लेकार हांणी सुरवेक विरोध केल्लो. पूण तांणी कसलीच कृती करूंक नाशिल्ल्यान हे विशीं तांकां विचारलें तेन्ना, सनबर्नाक विरोध करपा खातीर लोकूच रस्त्यार देंवले नात, ते खातीर हांवेंय विरोध केलो ना. अशी अजापीत करपी जाप आमदार आर्लेकार हांणी दिली. आतां हो महोत्सव येसस्वीपणान जालो. ताका लागून हाचेर चड उलोवप बरोबर न्हय अशेंय स्पश्टीकरण तांणी दिलें.
धारगळ पंचायत वाठरांत सनबर्न आयोजनाची खबर कळटकच आमदार आर्लेकार हांणी मतदारसंघांतले सरपंच, उपसरपंच, पंच, नागरीक, भाजपाचे कार्यकर्ते समर्थक हांची एक जाहीर सभा धारगळ पंचायत कचेरे मुखार आयोजीत करून ह्या महोत्सवाक विरोध केल्लो. आनी विरोध करतना पेडणें मतदारसंघांतलेच न्हय जाल्यार मांद्रें मतदारसंघांतले कांय आदले आनी सद्याचे सरपंच, उपसरपंच नागरीक व्हड संख्येन हाजीर आशिल्ले, आनी ह्या महोत्सवाक आमचोय पूर्ण विरोध आसतलो अशें जाहीर केल्लें.
जाल्यार त्याच दिसा दुसरे वटेन धारगळ पंचायत मंडळाची सत्ताधारी गटाची एक बसका जावन ते बसकेंत ह्या महोत्सवाक पुराय तेंको दिवपाचेंय जाहीर केलें. त्याच वेळार लोकांच्या लक्षांत आयिल्लें की ह्या महोत्सवा वेल्यान दोन गट धारगळ पंचायत वाठारांत निर्माण जाल्यात. म्हणून त्या वेळार धारगळे जाल्ले विरोधी सभेंत आमदार प्रवीण आर्लेकार हांणी सनबर्न महोत्सव आपूण खंयचेय परिस्थितींत जावंक दिवचो ना. जर हो महोत्सव सुरू जालो जाल्यार आपूण भितर घुसून तो उधळावन लावं अशी शिटकावणी दिल्ली. ह्या वेळार हाजीर आशिल्ल्या लोकांनी तशेंच सरपंच, उपसरपंच पंच वांगड्यांनीय तांकां पुरायपणान तेंको दिल्लो.
पूण जसो महोत्सव लागीं येवंक लागलो. तसो ह्या महोत्सवा खातीर जाल्लो विरोध मवाळ जावंक लागलो, आनी हो महोत्सव येसस्वीपणान आयोजीत केलो. ह्या महोत्सवाक विरोध करप्यांनी आपलो विरोध दाखयलो ना वा तो उधळावन लेगीत लायलो ना. हे खातीर आमदार प्रवीण आर्लेकार हांची प्रतिक्रिया विचारली तेन्ना तांणी म्हणलें, आपणें सुरवातेक लोकांनी विरोध केल्लो म्हणून आपणेय रस्त्यार येवन जाहीर सभा घेतली आनी विरोध केलो. पूण ह्या महोत्सवा खातीर लोकांनी विरोध केलो ना आनी रस्त्यारूय देंवले नात म्हणून आपणूय रस्त्यार देंवलो ना अशें म्हणलें.
मजगतीं, ह्या महोत्सवाक व्हड संख्येन विरोध करपी आशिल्ले तातूंतले खूबशे जाण महोत्सवांत वांटेकार जाल्ल्याचें दिसून आयलें.
पेडणेंचे आमदार प्रवीण आर्लेकार हांणी जे पद्दतीन सुरवाते सावन ह्या महोत्सवाक विरोध केल्लो, आनी वळावेळार पत्रकारांनी तांचे कडेन संपर्क सादून तांची प्रतिक्रिया घेवपाचो यत्न केलो तेन्ना आपणे दिल्लें उतर सत्यांत देंवयतलो अशें म्हणिल्लें. पूण तांचें उतर मात सत्यांत देंवलें ना. लोकूच रस्त्यार देंवले नात म्हणून आपूणय रस्त्यार देंवलो ना असो दावो आतां प्रवीण आर्लेकार करूंक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
