भांगरभूंय | प्रतिनिधी
चोर्ला घांट वाठारांत पालसणां कोसळपाची शक्यताय
प्रवाशांनी सादूर रावपाची शिटकावणी
वाळपय: शेनवारा रातभर आनी आयतारा दीसभर पडिल्ल्या उटंगाराच्या पावसाक लागून सत्तरी म्हालांतल्या न्हंयांच्या उदकाची पातळी वाडल्या. न्हंयांचेर बांदिल्ले बंधारे उदका खाला गेल्यात. बंधार्यांच्या खांब्यां वयल्यान उदकाचो प्रवाह व्हांवत आशिल्ल्याचें पळोवंक मेळटा. फाटल्या स दिसांत 28 इंच पावसाची नोंद जाल्या.
फाटल्या चार दिसां सावन सत्तरी म्हालांत उटंगाराचो पावस पडत आसा. हे खातीर न्हंयांच्या उदकाचे पातळेंत वाड जावंक लागल्या. मेळिल्ले म्हायती प्रमाण सत्तरी म्हालांत बांदिल्ले सगले बंधारे उदका खाला गेल्यात. उदकाची पातळी वाडूंक लागिल्ल्यान न्हंयेदेगेर आशिल्ल्या लोकवस्तींनी भिरांतीचें वातावरण पातळ्ळां. हाका लागून सद्या तरी कसलोच हुस्को करपाची गरज ना. गरज पडल्यार आपत्कालीन वेवस्थापनाची प्रक्रिया जलदगतीन राबयतले अशें मामलेदारान स्पश्ट केलां.
सत्तरी म्हालांतल्या म्हादय, व्हाळवाट, रगाडा, वेळूस ह्या न्हंयांचेर उदका स्रोत खात्या वतीन बंधारे बांदल्यात. हे सगले बंधारे उदका खाला गेल्यात. उदकाची पातळी वाडिल्ल्यान बंधाऱ्यांचे खांब दिसनात. न्हंयचे देगेर आशिल्ले लोकवस्तींत उदक घुसपाची शक्यताय निर्माण जाल्या. रातभर पावसाचें प्रमाण अशेंच सुरू उरल्यार लोकवस्तींत उदक येवपाची शक्यताय आसा. हाका लागून कांय प्रमाणांत भिरांतीचें वातावरण पातळ्ळां.
कर्नाटक शिमेंत घोग्यांनी पावस
मजगतीं, कर्नाटक वाठारांतल्या दोंगराळ वाठारांनी घोग्यांनी पावस पडत आसा. हाका लागून म्हादय न्हंयच्या उदकाचे पातळेंत वाड जावंक लागल्या. सद्या तरी उदकाची पातळी धोक्या मेरेन पावूंक लागल्या. ह्या मोसमांतल्या न्हंयांच्या उदकाची पातळी चड आशिल्ल्याचें उदका स्रोत खात्यान स्पश्ट केलां. तेच प्रमाण चोर्ला घांट वाठारांत उटंगाराचो पावस पडत आशिल्ल्यान व्हाळवाट, वेळूस न्हंयेच्या उदकाचे पातळेंत वाड जाल्या. अंजुणें धरण प्रकल्पांत उदकाचो सांठो गतीन वाडत आसा. तीन दिसां पयलीं उदकाची पातळी 82 मिटराचेर आशिल्ली. सद्या उदकाची पातळी 86 मिटरांचेर पावल्या. हाका लागून सुमार 65 टक्के धरण भरलां.
चोर्ला घांट वाठारांत चोर्ला घांट वाठारांत उटंगाराचो पावस पडत आसा. हाका लागून वाठारांतलीं पालसणां कोसळपाची शक्यताय आसा. हे खातीर गोंय-बेळगांव म्हामार्गा वयल्यान प्रवास करतना प्रवाशांनी सादुरताय बाळगुची अशें आवाहन आपत्कालीन वेवस्थापनाच्या अधिकाऱ्यांनी केला. खंयच्याय खिणाक पालसणां कोसळपाची शक्यताय आसा.
सादुरतायेचे आवाहन
फाटल्या दोन वर्सांत व्हड प्रमाणांत पालसणां कोसळपाच्यो घडणुको घडल्यात. फाटल्या चार दिसां सावन पावस पडत आशिल्ल्यान पालसणां कोसळपाची शक्यताय उक्तायतात.
थळाव्या पुलीस स्टेशना वतीन पुलिसांचो पंगड ह्या वाठारांनी तैनात केला. घडये अनुचीत प्रकार घडलो जाल्यार रोखडीच म्हायती आपत्कालीन वेवस्थापन यंत्रणेक दिले उपरांत रोखडीच मजत कार्याक सुरवात जातली. अशें यंत्रणेक स्पश्ट केलां.
झाडां पडून लुकसाण
सत्तरी म्हालांतल्या खूबशा वाठारांनी झाडां पडून सैमीक पडझड जाली. आयतारा सकाळीं सरकारी समाजीक हॉस्पिटलाचे इमारती मुखार गुलमोहराचें झाड पडून रस्तो येरादारी खातीर बंद जालो. उजो पालोवपी दळाचे यंत्रणेन रोखडीच घडणूक थळार धांव घेवन रस्तो मेकळो केलो.
मजगतीं, ठाणें ग्रामीण भलायकी केंद्राच्या इमारतीचें पाखें हुबून सामानाचें लुकसाण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
