भांगरभूंय | प्रतिनिधी
दिल्ली कोर्ट : चल्याक दोन वर्सां उपरांत जामीन
भांगरभूंय । खबरां संस्था
17 वर्सां पिरायेचे नेण्टे चलये कडेन परिपक्वताय आनी बौद्धीक तांक आसता, अशें निरिक्षण नोंद करून ‘पोक्सो’ खाला गुन्यांव नोंद केल्ल्या आरोपीक दिल्ली उच्च न्यायालयान जामीन दिलो. बंदखणींत गुन्यांवकारांच्या वांगडा रावून तरणाट्याचें आनीक लुकसाण जातलें अशें न्यायालयान म्हणलां. तशेंच, संमतीन जाल्ल्या प्रेमसंबंधांक गुन्यांवकारी स्वरूप दिवप हो ‘पोक्सो’चो हेत न्हय, अशेंय निरीक्षण नोंद केलां.
18 वर्सां पिराये सकयल्या भुरग्यांची लैंगीक शोशणा पसून मजत करपा खातीर ‘लैंगीक गुन्यांवा पसून भुरग्यांचें रक्षण कायदो’ आसा. संमतीन जाल्ल्या प्रेमसंबंदांक गुन्यांवांत बदलप हो कायद्याचो हेत न्हय, अशें न्यायमुर्तीन सांगलां.
नेमकें कितें प्रकरण?
17 वर्सां पिरायेची चली आनी 20 वर्सां पिरायेचो चलो हांचे मदीं प्रेमसंबंद निर्माण जाल्ले. तुजे कडेन लग्न जातलों अशें सांगून त्या चल्यान चलये कडेन शरिरीक संबंद दवरिल्ल्याचो आरोप चलयेन एफआयआरांत केला. चली गुरवार जाले उपरांत हें प्रकरण कोर्टा मेरेन पावलें. चलयेक त्या चल्या आड गुन्यांव नोंद करपाचो नाशिल्लो. पूण चली गुरुवार जाल्ल्या कारणान तिच्या कुटुंबियांनी आग्रो केलो आनी तिणें त्या चल्या आड गुन्यांव नोंद केलो. गर्भपात करपाचो काळ गेले उपरांत हें प्रकरण उक्ताडार आयलें, अशें कोर्टान म्हणलें.
घडणुके वेळार चली नेण्टी आशिल्ली. पूण तिची पिराय 17.5 वर्सां आशिल्ली. हे पिरायेचेर चलये भितर जाय ती परिपक्वता आनी बौद्धीक तांक निर्माण जाता. जाल्यार तो चलो 20 पिरायेचो आशिल्लो अशेंय कोर्टान सांगलें.
तरणाटो 15 ऑक्टोबर 2021 सावन बंदखणींत आशिल्लो. त्या तरणाट्याक बंदखणींत दवरून कसलोच हेतू साध्य जावचो ना. तशेंच ताका गुन्यांवकारां वांगडा दवरल्यार ताचें आनीक लुकसाण जातलें. ताका लागून कोर्टान 20 हजार रुपयांच्यो बाॅण्डाचेर ताका जामीन मंजूर केला.
कोर्टान याचिका करप्यांक परवानगी बगर शार सोडचें न्हय आनी केस सुनावणी खातीर घेतले तेन्ना ट्रायल कोर्टांत हाजीर रावपाचे आदेश दिल्यात. तशेंच ताका ताचो मोबायल चालूच दवरचो, स्वीच आॅफ करचो न्हय, अशें सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
