भांगरभूंय | प्रतिनिधी
मुंबय, खबरां संस्था : ‘श्री महिला गृहउद्देग लिज्जत पापड’च्यो सहसंस्थापिका जसवंतीबेन जमनादास पोपट (९३) हांकां जाण्टेपणार मरण आयलें. गिरगावांतले शंकर बारी लेन हांगाच्या ‘हलिया लोहाणा निवास’ हे इमारतीचे दुसरे माळयेर ती रावताली. हजारांनी बायलांक काम दिवपी जसवंतीबेन पोपट हिका पद्मश्री पुरस्कारूय फावो जाला.
मार्च १९५९ त मुंबयत गिरगांवांतल्या सात बायलांनी ‘श्री महिला गृहउद्देग लिज्जत पापड’ ह्या पापड करपाच्या वेवसायाक सुरवात केली. सात बायलांनी ८० रुपयांनी सुरू केल्लो पापड उद्देग कोट्यांनी गिरायकांच्या घरांनी पावोवपाक जसंवतीबेन हांचें मोलादीक योगदान आशिल्लें. जसवंतीबेन पोपट हांणी शिक्षण, भलायकी, नितळसाण संबंदीत विवीध उपक्रमांनी वांटो घेतला.
80 रुपया रीण काडून हो उद्देग सुरू केल्लो. आयज ताची उलाढाल 2000 कोटींचेर पावल्या. 50 हजारां वयर लोक तातूंत काम करतात. जसवंतीबेन हांचे वांगडा पार्वतीबेन रामदास थडानी, उजमाबेन नारायणदास कुंडालीया, बानूबेन एन तन्ना, लघुबेन अमृतलाल गोकाणी, जयाबेन व्ही. विठालानी आनी दिवालीबेन लुक्का हांणी हो वेवसाय सुरू केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
