भांगरभूंय | प्रतिनिधी
भांगरभूंय I प्रतिनिधी
म्हापशेंः भलायकी मंत्री विश्वजीत राणे हांणी आपलो बापूय आदले मुख्यमंत्री प्रतापसिंह राणे हांच्या 83व्या वाडदिसा निमतान शेनवारा म्हापशेंतल्या नामनेचे जागृत देवस्थान आशिल्ल्या श्री देव बोडगेश्वराक भांगराची मशाल अर्पण केल्या.
जात्रे निमतान मंत्री विश्वजीत राणे हांणी श्री देव बोडगेश्वराचे दर्शन घेतले उपरांत आपल्या बापायच्या वाडदिसा निमतान देवाक भांगराची मशाल अर्पण करपाची इत्सा उक्तायिल्ली. ते प्रमाण ही मशाल तांणी विधीवत पूजा आनी मंत्रौच्चार करून पुरयतांच्या मार्गदर्शना खाला देवाक अर्पण केल्या. हे भांगरा मशालेचें मोल देड कोटी रुपया आसा.
शेनवारा सकाळीं मंदिरांत लघुरूद्र आनी मशालीचे शुद्धीकरण केले उपरांत ती देवस्थानाक भेटयली. सुरवातीक मंत्री विश्वजीत राणे आनी तांची घरकान्न दिव्या राणे हांचे यजमानके खाला धर्मीक विधी जाले उपरांत श्री देव बोडगेश्वर देवस्थानाचे अध्यक्ष आनंद भाईडकार हांणी मशाल देवाक अर्पण केली. मशाल अर्पण विधी निमतान समितीचे पदाधिकारी तशेंच भाविकांनी मंदिरांत व्हड संख्येन गर्दी केल्ली.
भांगराचो राज दांडो, भांगरा सरपळी आनी भांगराची मशाल हे देवाच्या कुडी वयले भांगरा अलंकार ह्या मशाल अर्पणविधी सुवाळ्या निमतान भाविकांक पळोवपाक मेळचे म्हूण शेनवार 28 आनी आयतार 29 अशें दोन दीस दवरतले. देश दर्शना सयत भाविकांक हे अलंकार पळोवपाची संद मेळटली.
-देवस्थान गिरेस्त करपा कडेन समितीन वाटचाल सुरू केल्या. येवपी 2024चे बोडगेश्वर जात्रोत्सवा वेळार देवाक भांगराचो फेटो अर्पण करतले. ह्या फेट्या खातीर देड ते दोन कोटी रुपया खर्च अपेक्षीत आसा. देवस्थानाचो निधी वापरिनासतना राज दांड्या प्रमाण भाविकां कडल्यान हो निधी एकठांय करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
