भांगरभूंय | प्रतिनिधी
रमेश तवडकार: ल्हान कामां खातीर चेपण कित्याक घालूं?
आमदार कामां करप खातीर चेपण घालता: शोभना वेळीप
मडगांव: जिल्हो पंचायत वांगडी शोभना वेळीप ह्यो भाजपाचे तिकेटीचेर वेंचून आयल्यात. पूण त्यो पक्षकार्या पसून सदांच पयस आसतात. हे विशीं पक्षा कडेनूय केन्ना कागाळ केल्ली ना आनी तांकां सदांच राखण दिली. व्हड व्हड प्रकल्प हांवें हातांत घेतिल्ले आसतना फक्त पांच लाखांच्या कामा खातीर तांचेर चेपण कित्याक घालूं? पूण म्हजी बदनामी करपा खातीर कोण तरी शोभना हांकां मुखार काडटा अशें सभापती रमेश तवडकार हांणी स्पश्ट केलें.
जिल्हो पंचायत वांगडी शोभना वेळीप हांणी काणकोणचे आमदार आनी सभापती रमेश तवडकार कामां करपा खातीर चेपण हाडटात आनी अपात्र थारावपाची धमकी दिल्ल्याचो आरोप केल्लो.
हे विशीं तवडकार हांचे कडेन ‘भांगरभूंय’न संपर्क सादलो तेन्ना शोभना वेळीप ह्यो पैंगीण मतदारसंघाच्यो जिल्हो पंचायत वांगडी आसात. त्यो भाजपाच्या चिन्नाचेर वेंचून आयल्यात. खरें म्हणल्यार तांचे कडेन 20 ते 25 मतां घेवपाची लेगीत शक्त ना. वेंचून येत सावन त्यो पक्षाच्या कामांतल्यान पुरायेन कुशीक आसात. पक्षाच्या कामांत तांचो वांटो ना. लोकोत्सव जायत आशिल्ले सुवाते वेले शाळे कुशीक फक्त 5 लाखांचें काम करपाक तांकां सांगिल्लें. वेळीप थंय आयल्यो आनी तें काम पळोवन गेल्यो. हांवें तांकां कांयच वायट उलोयलो ना. पक्षाच्या कार्यांत त्यो वांटेकार जायनाशिल्ल्यान तांचे कडेन कोणूच व्हडलेशें लक्ष दिनात. ह्याच कारणा खातीर जिल्हो पंचायत वांगडी आसून लेगीत आपणाक कोणूच विचारिनात हे खातीर तांचो अहंकार बी दुखावला आसत अशें तवडकार हांणी म्हणलें.
शोभना वेळीप ह्यो आदर्श कृशी सोसायटिच्यो संचालिका आसात. आयतारा तांच्या सोसायटीची कार्यावळ जाली. थंय सावन ह्या सगल्या प्रकाराची सुरवात जाली. नाजाल्यार शोभना वेळीप जिल्हो पंचायत वांगडी आसात काय ना हाचोय विचार तकलेंत ना. लोकोत्सवांत तांकां हांव आपयना. हाचीच तांकां तिडक आसुये. पूण लोकोत्सव ही सरकारी कार्यावळ नाशिल्ली. आमदार म्हूण हांवें वैयक्तीक पांवड्यार कार्यावळ आयोजीत केल्ली. ताका लागून कोणाक आपोवचें तें आयोजक थारायतात अशेंय तवडकार हांणी मुखार उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
