भांगरभूंय | प्रतिनिधी
भांगरभूंय । बातमीदार
शिवोले : मार्ना शिवोले पंचायत वाठारांतल्या वार्ड क्रमांक पांचांतलें वादग्रस्त चिकन मटण सेंटर निमाणें बंद केलें.
फाटल्या कांय वर्सां सावन हांगा मुस्कान चिकन सेंटर चालू आशिल्लें. ह्या सेंटरा आड खुबश्यो कागळी पंचायती कडेन केल्ल्यो. ताचो परवानो ऑक्टोबर 2022 वर्सा काबार जाल्लो. लोकांच्यो वाडपी कागाळी लक्षांत घेवन ह्या सेंटराचो नुतनीकरण परवानो पंचायतीन न्हयकारलो.
ह्या सेंटरा आड थळाव्यांनी नवी कागाळ नोंद केल्ल्यान पंचायतीन सकाळीं तपासणी करपाचो निर्णय घेतलो. ह्या वेळार व्हडा संख्येन थळावे हाजीर आशिल्ले. सेंटराच्या धनयान दुकान बंद करपाक न्हयकार दिल्ल्यान ताण वाडलो. ह्या वेळार पुलीसूय हाजीर आशिल्ले.
ह्या वाठारांतलीं गोरवां गायब जातात. ह्या प्रकरणांत ह्या सेंटराचो हात आशिल्ल्याचो गंभीर आरोप थळावे तरणाटे सुरज चोडणकार हांणी केला.
दुकानांत दवरपी मांसाक लागून हांगच्यान यो- वच करपी विद्यार्थ्यांच्या मनाचेर परिणाम जाता. इतलेंच न्हय ह्या सेंटरांतली हळशीक गांवांत खंयसरूय व्हरून उडयतात, असोय आरोप चोडणकार हांणी केलो.
सेंटर केलें बंद
चिकन मटण सेंटरच्या परवान्याचें पंचायतीन नुतनीकरण करूंक नाशिल्ल्यान ताच्या धनयान तें बंद करचें. नाजल्यार तें सील करतले अशी शिटकावणी दिली. निमाणें सेंटराच्या धनयान स्वता हें सेंटर बंद केलें, अशी म्हायती सरपंच अभय शिरोडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
