वीज खात्यांत कर्मचार्यांचो उणाव
भांगरभूंय | प्रतिनिधी
चवथी पयली लायनमनाची जातली भरती
पणजी : वीज खात्यांत 1200 कर्मचार्यांचो उणाव आसा. कर्मचारी भरती आयोग तशेंच खात्या वरवीं कर्मचार्यांची भरती जातली. लायनमनाचो उणाव चवथी पयलीं पयस जातलो, अशें वीजमंत्री सुदीन ढवळीकार हांणी सांगलें.
सभाघरांत मंगळारा वीज खात्याचेर चर्चा जाली. आमदार संकल्प आमोणकार, अलेक्स सिक्वेरा हांणी लायनमनांचो विशय काडलो. खात्यांत लायनमनांची 301 पदां खाली आसात. हाचे उपरांत वायरमनांची 207 आनी 134 हेर पदां खाली आसात. वीज खात्यान 255 लायनमनांचीं पदां भरपा खातीर जायरात दिल्या. भरतीची प्रक्रीया सुरू आसा. लायनमना भायर हेर पदां कर्मचारी भरती आयोगा वरवीं भरतले, अशें ढवळीकार हांणी सांगलें.
खात्यांत कनिश्ट अभियंत्यांचोय उणाव आसा. कर्मचारी भरती आयोगा वरवीं कनिश्ट अभियंत्यांची भरती जातली, अशें ढवळीकार हांणी सांगलें. कंत्राटी पद्दतीचेर आशिल्ल्या लायनमनांक कायम करपाचेर हांव विचार करतां, अशें अलेक्स सिक्वेरा हांच्या प्रस्नाक जाप दितना मंत्री ढवळीकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
