भांगरभूंय | प्रतिनिधी
म्हापशें, प्रतिनिधी ः साळगांवां दोग रस्ताद सुण्यांक वीख घाल्ल्यान मरण आयलें. ह्या प्रकरणांत पुलिसांनी दुबावीत झेवियर मिस्कीता हाचे आड गुन्यांव नोंद केला.
ही घडणूक सोमारा, १५ जानेवारीक सकाळीं घडली. ह्या प्रकरणांत अनिरूद्ध रस्तोजी (मूळ छत्तीसड) हांणी पुलीशेंत कागाळ केल्या. कागाळदार कुटूंब साळगांवां कासा दा काम्बो ह्या वाड्यार भाड्याक रावतात. हें कुटूंब श्वान मोगी आशिल्ल्यान घरा शेजराक रस्त्यार भोंवपी दोग रस्ताद सुण्यांक तीं जेवण घालतालीं.
घडणुके दिसा हीं दोनूय सुणीं बेशुद्ध अवस्थेंत दिसलीं. कागाळदारांनी तांकां रोखडींच तांच्या खाजगी जनावरां चिकित्सक दोतोरा कडेन व्हेलें. दोतोरान तांकां मरण आयिल्ल्याचें सांगलें. तपासणे वेळार सुण्यांच्या पोटांत मांसाचे कुडके सांपडले. ताका लागून विखारी जेवण खाल्ल्यान ह्या सुण्यांक मरण आयिल्ल्याचें दोतोरांनी सांगलें.
हे वीख दुबावीत मिस्किता हांणी त्या सुण्यांक घाल्ल्याचो दुबाव कागाळदारांनी उक्तायला. हीं सुणीं दुबाविताच्या काकाच्या घरा कडेन वचून बुरशेपणां करतालीं, देखून ताका त्या सुण्यांचो राग येतालो. दोनूय सुण्यांचो पोस्टमार्टम केल्या उपरांत साळगांव पुलिसांनी ह्या प्रकरणांत गुन्यांव नोंद केला. फुडलो तपास पुलीस निरीक्षक मिलिंद भुईंबर हांच्या मार्गदर्शनाखाला हवालदार तारक कुडासकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
