भांगरभूंय | प्रतिनिधी
पणजी: राज्यांतल्या आयएएस अधिकाऱ्यांनी विधानसभा अधिवेशन उण्यांत उणें पंदरा दिसांचें करपा खातीर सरकाराक सुचोवण्यो करच्यो अशी मागणी आम आदमी पक्षाचे आमदार व्हेंजी व्हिएगश हांणी केली. बिरेस्तारा पणजेंत घेतिल्ले पत्रकार परिशदेंत ते उलयताले. ह्या वेळार प्रदेशाध्यक्ष अमीत पालेकार आनी फ्रान्सीस कुएलो हाजीर आशिल्ले.
व्हिएगश हांणी म्हणलें, अधिवेशन फक्त दोन दिसांचें दवरून सरकार लोकशायेचो आवाज चेपून उडोवपाचो यत्न करता. हे खातीर आमी राज्यपालांक मेळून अधिवेशनाचो काळ वाडोवपा खातीर विनंती करतले. आमचो मंत्र्यांचेर विस्वास नाशिल्ल्यान आमी राज्यांतल्या 12 आयएएस अधिकाऱ्यांक पत्र बरयतले. तांणी सरकाराक अधिवेशनाचो काळ वाडोवपा खातीर यत्न करप गरजेचें आसा.
व्हिएगश हांणी मुखार म्हणलें, आयएएस अधिकारी हें जबाबदार पद. विवीध खात्यांत खूबशे प्रस्न प्रलंबीत आसात. अशा वेळार फक्त दोन दिसां भितर हे प्रस्न अधिवेशनांत येवंक शकनात. हे खातीर सामान्य गोंयकारांचेर अन्याय जातलो. ह्या अधिकाऱ्यांनी सगले प्रस्न येवचे हे खातीर सरकाराक अधिवेशनाचो काळ पंदरा दिसांचो करपाचो प्रस्ताव दिवचो. अशें जालें ना जाल्यार आमी केंद्रीय मंत्रालयांत ह्या अधिकाऱ्यांची कागाळ करतले.
अमीत पालेकार हांणी म्हणलें, राज्यांत कायदो आनी सुवेवस्था कोसळ्ळ्या. घुंवळे वखदांचो वेवसाय पातळ्ळा. पुलिसांनी लोकां खातीर काम करूंक जाय. पूण सद्या सामान्य मनीस पुलिसां कडेन वचपाक भियेतात. ही परिस्थिती बदलूंक जाय. शारांनी आनी गांवगिऱ्या वाठारांनी अदीक पुलीस स्टेशनां आसप गरजेचें आसा. पर्यटन मळार लेगीत कांय बदल जावप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
