भांगरभूंय | प्रतिनिधी
वास्को: विद्यार्थ्यांनी अभ्यासा बरोबर कुशळटाय शिक्षणा कडेन लक्ष दिवंक जाय अशें आवाहन मुख्यमंत्री डॉ. प्रमोद सावंत हांणी एके कार्यावळींत केलें. फुडारांत उंचेल्या पांवड्यार वचपा खातीर शिक्षण म्हत्वाचें आसा हें तांणी विद्यार्थ्यांक पटोवन दिलें. भुरग्यां मदीं गणीत, विज्ञान, तंत्रज्ञान, अभियांत्रिकी विशयांतल्या भिरांत पयस करपा खातीर ‘विज्ञानधारा’ उपक्रमाची सुरवात गोंयांत केल्ल्याची म्हायती तांणी दिली.
सड्यार मुरगांव हायस्कुलाच्या भांगरा उत्सवी वर्सा निमतान आयोजीत केल्ल्या भोवमान, स्नेहसंमेलन, इनामां भेटवण सुवाळ्यांक मुख्यमंत्री मुखेल सोयरे ह्या नात्यान उलयताले.
ह्या वेळार माचयेर राज्यसभा खासदार सदानंद शेट तानावडे, मुरगांवचे आमदार संकल्प आमोणकार, साळगांवचे आमदार केदार नायक, शाळेच्या वेवस्थापक समितीचे अध्यक्ष आल्मींद करमली, विश्वस्त शामीन करमली, वेवस्थापिका स्मिता धुमे, मुख्याध्यापक तुळशीदास देसाय, पालक शिक्षक संघाचे अध्यक्ष शिवदया देसाय हजर आशिल्ले.
डॉ. प्रमोद सावंत हांणी शिक्षक वर्गाचें अभिनंदन केलें. येता म्हयन्याभरांत शाळेक डढएच प्रयोगशाळा दिवपाचें आस्वासन दिलें. ह्या वेळार शाळेच्या संकुलांत उबारिल्ल्या डॉ. रवींद्र करमली हांच्या अर्दपुतळ्याचें अनावरण तशेंच यादस्तिकेचें प्रकाशन डॉ. सावंत हांचे हस्तुकीं केलें. तशेंच आदले शिक्षक आनी 25 वर्सां पुराय केल्ल्या शिक्षकाचो भोवमान केलो.
तुळशीदास देसाय हांणी वर्सुकी अहवाल सादर केलो. आल्मींद करमली हांणी सोयऱ्यांक येवकार दिलो. शिक्षक जोसेफ फर्नांडीस आनी दीपा सुर्लकार हांणी सोयऱ्यांची वळख करून दिली. शिक्षिका निलिमा कर्पे, मोनिका कार्दोज, प्रज्ञा शिरोडकार हांणी सुत्रसंचालन केलें. ड्रॉजीला सिल्वेरा हांणी उपकार मानले. ह्या वेळार विद्यार्थ्यांनी सांस्कृतीक कार्यावळ सादर केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
