भांगरभूंय | प्रतिनिधी
पणजीः लोकसभा वेंचणुकेचे जाहीर केल्ले अंतीन मतदार वळेरे प्रमाण गोंयांत दादल्यां परस महिला मतदार चड आसात. गोंयांत 40 विधानसभा मतदारसंघ आसात. तातूंतलो वास्को सोडीत जाल्यार म्हणल्यार 39 मतदारसंघांनी महिला मतदार चड आसा. फक्त वास्को मतदारसंघ ताका आडवाद. ह्या एकाच मतदारसंघांत दादले मतदारांचो आंकडो चड आसा. दक्षीण गोंयच्या नुवें मतदारसंघांत दादल्यांचे तुळेंत महिला मतदार 2,302 न चड आसात.
लोकसभा 2024 चे वेंचणुके खातीर उत्तर गोंय आनी दक्षीण गोंय मतदारसंघांत वट्ट 5 लाख 71 हजार 617 दादले जाल्यार 6 लाख 7 हजार 715 महिला मतदारांची मतदार वळेरेंत नोंद जाल्या. नुवें उपरांत वेळ्ळी मतदारसंघांत महिला मतदार दादल्यां परस 1,889 न चड आसात. ते उपरांत सांत आंद्रे (1,889 न चड), फांतोड्डें (1,664 न चड), बाणावली (1,640 न चड) आनी ताळगांव (1599 न चड) हांचो नंबर लागता.
फाटले दोन लोकसभा वेंचणुकेंत लेगीत दादल्यांचे तुळेंत महिला मतदार चड आशिल्ल्यो. तेन्ना दादल्यांचे तुळेंत महिलांचें मतदानाचें प्रमाणूय चड आशिल्लें. हे खेपे महिला मतदारांचें मतदानाचें प्रमाण चड जालें जाल्यार उमेदवाराक जिखून हाडपाक तांची भुमिका म्हत्वाची थारतली.
वेंचणूक आयोगान जारी केल्ले आंकडेवारी प्रमाण 2014 त दोनूय मतदारसंघांनी मेळून 8 लाख 17 हजार 440 मतदान जाल्लें. तातूंतलें 51.38 टक्के म्हणल्यार 4 लाख 20 हजार 30 मतदान महिलांचें आशिल्लें. जाल्यार दादल्यांचें मतदान 48.62 टक्के आशिल्लें. 2014 त मतदार वळेरेंत नांव आशिल्ल्या मदल्या 78.88 टक्के महिलांनी मतदान केल्लें. 2014 त वट्ट 77.06 टक्के मतदान जाल्लें. 2019 त लेगीत दादल्यांचे तुळेंत महिला मतदार आघाडेर आशिल्ल्यो. 2019 त गोंयांत वट्ट 8 लाख 53 हजार 724 मतदान जाल्लें. तातूंतलें 51.75 टक्के म्हणल्यार 4 लाख 41 हजार 780 मतदान महिलांचें आशिल्लें, जाल्यार दादल्यांचें मतदान आशिल्लें 48.25 टक्के. 2019 त मतदार वळेरेंत नांव आशिल्ल्यां मदल्या 76.16 टक्के महिलांनी मतदान केल्लें. 2019 त गोंयांत लोकसभे खातीर वट्ट 75.14 टक्के मतदान जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
