भांगरभूंय | प्रतिनिधी
वास्को, प्रतिनिधी : वास्को पुलिसांनी शिवानी राजावत (२६) आनी तिची आवय जयदेवी चौहान (५०) हांच्या मरणा प्रकरणांत अनुराग सिंह राजावत हाका अटक केल्ली. वास्को पयली श्रेणी न्यायालयान दुबाविताक पुलीस बंदखण दिल्या. दुबावितान जामिना खातीर दक्षीण गोंय जिल्हो न्यायालयांत अर्ज केला. हाचेर १५ जानेवारीक सुनावणी जातली.
हुंड्या खातीर अनुराग सिंह हांणी कट करून आपली बायल शिवानी आनी सासू जयदेवी हांचो खून केल्ल्याचो ठपको तांचेर आसा. जाल्यार अनुराग सिंहाच्या आवयकूय आरोपी केल्या.
१८ नोब्हेंबर २०२४ दिसा सकाळीं गॅसीचो सिलिंडर पेटून शिवानी आनी तिची आवय जयदेवी ह्या दोगांयकूय हुलपून मरण आयिल्लें. पयलीं हें प्रकरण सिलिंडर गळटीचें कशें दिसतालें. मात चवकशे उपरांत तेंवेगळेच वाटेन वचपाक लागलें. शिवानीच्या लग्नाक सात वर्सां जावचे पयलींच मरण आयिल्ल्यान कायद्या प्रमाण ह्या मरणाची चवकशी मुरगांवचे विभागीय न्यायदंडाधिकारी भगवंत करमली हांणी केली. चवकशे उपरांत आपलो ९० पानांचो अहवाल तांणी वास्को पुलिसांक २१ डिसेंबराक दिलो. उपरांत शिवानी राजावत हिच्या मरणा प्रकरणांत वास्को पुलिसांनी अनुराग सिंह राजावत हाचे आड २३ डिसेंबराक हुंडाबळी खाला गुन्यांव नोंद केल्लो. पयलें असैमीक मरणा खाला हें प्रकरण दाखल केल्लें. पूण चवकशे उपरांत अनुराग हाचे आड खूना खाला गुन्यांव नोंद करून अटक केली.
आपले भयणीचो हुंड्या खातीर तिचो घोव आनी माय छळ करताली अशें शिवानीच्या भावान कागाळींत सांगिल्लें. उपरांत न्यादंडाधिकारी करमली हांणी साक्षीदारांच्यो जबानी नोंद केल्यो. तांणी गॅस गळटी फाटल्यान अनुरागा विशीं दुबाव उक्तायलो. ताणे ८ नोव्हेंबराक गॅस गळटीन उजो पेटचो देखून मुद्दम जावन एलपीजी गॅस सिलिंडरचो नॉब चालूच दवरिल्लो, अशें पुलिसांनी सांगलें. उपरांत तो सकाळीं बाजारांत गेलो. गॅस गळून कुडींत गॅस एकठांय जालो. थंय उजो पेटून शिवानी आनी तिचें आवय मरण आयलें. हे संबंदी वास्कोचे उपअधीक्षक सलिम शेख हांच्या मार्गदर्शना खाला निरीक्षक कपिल नायक तपास करतात.
पुलिसांनी चवकशी सुरू केल्या उपरांत अनुराग हाका जबानी खातीर परत परत आपोवन लेगीत योग्य सहकार्य मेळूंक नाशिल्ल्यान ताका अटक केली. अटक जाल्या उपरांत दुबावीत अनुराग हांणी दक्षीण गोंय जिल्हो न्यायालयांत जामिना खातीरी अर्ज दाखल केलो. हाचेर शुक्रारा सुनावणी जाली तेन्ना सरकारी वकिलांन म्हणणें सादर करपा खातीर वेळ दिवपाची मागणी केली. ताका लागून हे विशीं फुडली सुनावणी १५ जानेवारीक दनपरां २.३० वरांचेर जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
