भांगरभूंय | प्रतिनिधी
वास्को: सड्यार कांय विक्रेत्यांनी सिगार आनी हेर तंबाकू उत्पादन कायदो 2003 (कोटपा) च्या कलम 4 आनी 6 (अ) चें उल्लंघन केल्ल्या प्रकरणांत मुरगांव म्हाल अंमलबजावणी पंगडान संबंदितांक दंड दिलो. 13 जाणांक दंड दिवन तांचे कडल्यान 2600 रुपया वसूल केले.
ह्या पंगडांत मुरगांवचे जोड मामलेदार रोझारियो कार्व्हालो, गोवा कॅनचे रोलाण्ड मार्टिन्स, मामलेदार कचेरेचे मंडल निरिक्षक हनुमान मांद्रेंकार, भलायकी खात्याचे वास्को शार नितळसाण निरिक्षक दयानंद ठक्कर, मुरगांव पुलीस स्टेशनाचे कॉन्स्टेबल विष्णु तांबुलकार, सुरज पाटील हांचो आस्पाव आशिल्लो.
कारवाय केल्ल्या विक्रेत्यांनी अन्न आनी वखदां प्रशासन संचालनालया कडेन नोंदणी केल्ल्याचो दावो केल्लो. पूण तांणी नोंदणी तपशील प्रदर्शीत करूंक नाशिल्ल्याचें तपासणी वेळार पंगडाक दिसून आयलें.
कांय विक्रेत्यांच्या दुकानांत कोटपा खाला गरजे प्रमाण धुम्रपान निशेध संबंदी फलक योग्य रितीन प्रदर्शीत करूंक नाशिल्ल्याचें दिसून आयलें. हे संबंदीचो अहवाल दक्षीण गोंयच्यो जिल्होधिकारी ज्योती कुमारी आनी वांगडी सचीव सारा जॉर्ज हांचे बरोबर जावपी जिल्हो पांवड्या वयले समन्वय समितीचो तिमाही नियाळ बसकेंत सादर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
