भांगरभूंय | प्रतिनिधी
वास्को: नवें वाडें वास्कोचो मेहबूब शेख (25) हाच्या खून प्रकरणांत अटक केल्लो अँथनी फर्नांडीस हाका सोमारा न्यायालयांत उबो करतकूच ताका सात दीस पुलीस कोठयेचो रिमांड दिला. ह्या खून प्रकरणांत अँथनीन वापरिल्लो चाकू तशेंच मेहबूब शेख हाणे वापरिल्ली बॅट पुलिसांनी घडणूक थळा वयल्यान ताब्यांत घेतल्यात.
नवें वाडें हांगासरल्या हावसींग बोर्ड कॉलनींत रावपी मेहबूब आनी अँथनी हांची घटमूट इश्टागत आशिल्ली. पूण एका प्रकरणा वयल्यान तांचे मदीं वितुश्ट आयलें. मेहबूब हाच्या एका प्रकरणा संबंदांन न्यायालयांत सुरू आशिल्ल्या खटल्यांत अँथनी हाे ताचे आड साक्षिदार जाल्लो. ताका लागून मेहबूब हाणें ताका साक्षिदार जावं नाका अशी सेगीत विनंती केली. पूण अँथनी फाटीं सरलो ना. ताका लागून त्या दोगांय मदीं सेगीत वाद जावंक लागले. अँथनी आनी ताचो भाव थंयच्या एका कुडींत रावतात.
आयतारा दनपारां ते दोगूय वास्को शार वाठारांत एकामेका मुखार आयले उपरांत तांचे मदीं वाद जालो. उपरांत तांणी एकामेकांक आव्हान दिलें. त्या आव्हानाचो दोगांनीय स्विकार केलो. उपरांत ते नवे वाडें हांगा गेले. थंय तांचे मदीं परतून वाद जालो. प्रकरण मारपेटीचेर आयले उपरांत मेहबूब हाणें आपले कडेन आशिल्ल्या बॅटान अँथनीचेर हल्लो करपाचो यत्न केलो. तेन्ना अँथनीन चाकवाचे दोन वार मेहबूबाच्या हड्ड्यार केले. चाकवान हल्लो केल्ल्यान मेहबूब गंभीर जखमी जालो. ताका हॉस्पिटलांत व्हरतकूच थंय ताका मरण आयिल्ल्याचें दोतोरांनी जाहीर केलें. उपरांत वास्को पुलिसांनी अँथनीक खुनाच्या गुन्यांवा खाला अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
