भांगरभूंय | प्रतिनिधी
पंदरा दिसांनी समस्या सोडयना जाल्यार आंदोलन : आमदार आमोणकार हांची शिटकावणी
वास्को, प्रतिनिधी: सडो, बोगदो, जेटी वाठारांतल्या लोकांक कोळसो प्रदुशणा उपरांत आतां घाणयार्या वासाचो त्रास सोंसचो पडटा. हे समस्येची दखल घेवन मुरगांवचे आमदार संकल्प आमोणकार हांणी येवपी पंदरा दिसांनी ही समस्या सोडयना जाल्यार आंदोलन करपाची शिटकावणी कोळसो हाताळणी करपी जेएसडब्ल्यू, अदानी, मुरगांव बंदर प्राधिकरणाच्या प्रतिनिधींक दिली. आतां मेरेन सड्यार लोक कोयराची घाण सोंसतात, आतां मुरगांव बंदरा वयल्यान येवपी घाणीचो तांकां त्रास जाता. हे घाणीचो स्रोत सोदून काडून ताचे उपाय करपा खातीर संबंदीतांनी खर पावलां उबारचीं, अशे निर्देश आमोणकार हांणी दिलो.
हाचे पयलीं असो दुर्गंध केन्नाच येनासलो. मुरगांवच्या लोकांक कांयच फायदो नासतना तांणी ही घाण कित्याक सोंसची असो प्रस्न आमोणकार हांणी हाजीर केलो.
हे विशीं गंभीर दखल घेवन आमोणकार हांणी जेएसडब्ल्यू, अदानी, मुरगाव बंदर प्राधिकरण, पुलीस, भलायकी, गोंय राज्य प्रदूशण नियंत्रण मंडळ तशेंच संबंदीत यंत्रणेच्या प्रतिनिधींक तांणी बसकेक हाजीर रावपाची मागणी केली. ते प्रमाण मुरगांवचे उपजिल्होधिकारी भगवंत करमली हांचे सयत बिरेस्तारा संबंधितांची बसका घेतले. ह्या वेळार आमदार आमोणकार हांणी ह्यो समस्या संबंदीतांच्या मुखार मांडून ताचेर योग्य उपाय करपाक सांगलें. हे विशीं संबंधितांनी ह्या घाणयार्या वासाचो स्रोत सोदपाक सहकार्य करपाचें आस्वासन दिलें.
जेएसडब्ल्यू, अदानी, मुरगांव बंदर प्राधिकरण हांकां एका सप्तकाची मुजत दिल्या. हो वास कोळश्याचो न्हय अशें तांचें म्हणणें आसा. जर पंदरा दिसांनी हे विशीं तोडगो मेळूंक ना. जाल्यार मुरगांवच्या लोकां वांगडा तुमचे आड आंदोलन करचें पडटलें अशें आमोणकार हांणी संबंदीत प्रतिनिधींक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
