भांगरभूंय | प्रतिनिधी
वाळपय: सद्या सत्तरी म्हालांत घोग्यांनी पडटल्या पावसात झाडां पडपाच्यो घडणुको घडत आसात. हातूंत कांय जाणांच्या घरांचेर जाल्यार कांय झाडां रस्त्यार पडत आसात. तेच प्रमाण एक झाड बुधवारा वाळपय-होंडा रस्त्या वेल्या व्हॉल्तार पडलें. हाची दखल घेवन तें झाड उजो पालोवपी दळाच्या जवानांनी कापून रस्तो मेकळो करून दिलो. पूण तें कापिल्लें झाड रस्त्यारूच आशिल्ल्यान अपघात जावपाची शक्यताय निर्माण जाल्या.
ह्या रस्त्या वयल्यान सरकारी खात्याचे अधिकारी यो-वच करीत आसतात, पूण अजून तें कापिल्लें झाड कुशीक काडपा खातीर कोणेच कश्ट घेतिल्ले नात.
नेटाच्या वाऱ्याक लागून वाळपय-होंडा रस्त्याचे कुशीक आशिल्लें एक मोटें झाड रस्त्यार मदीं पडिल्लें. हाका लागून येरादारीची कोंयडी जाल्ली. हाची दखल घेवन उजो पालोवपी दळाच्या जवानांनी तें झाड कापून ताचे कुडके करून रस्तो मेकळो करून दिलो. पूण कापिल्ल्या झाडाचे मोटे कुडके रस्त्यारूच दिसून येत आशिल्ल्यान रस्तो व्यापून गेला.
हो रस्तो वाळपय-होंडा मजगतचो मुखेल रस्तो आशिल्ल्यान वाठारांत व्हड प्रमाणांत वाहनांची येरादारी सुरू आसता. तातूंत जंय झाड कापून दवरलां थंय एक ल्हानशें व्हॉल्त आशिल्ल्यान वाठारांतल्यान यो-वच करपी वाहनांक हाका लागून चड धोको निर्माण जाला. ते खातीर संबंदीत खात्यान हाची दखल घेवन तें कापिल्लें झाड कुशीक काडपाची मागणी वाहन चालकां कडल्यान जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
