भांगरभूंय | प्रतिनिधी
दोन दुयेंती सांपडले; खूबशा सुवातांनी फॉगींगाचेर भर
वाळपय: सद्या गोंयांत डेंग्यूचे दुयेंती वाडत आसात. खूबशे कडेन व्हड प्रमाणांत डेंग्यूचे दुयेंती सांपडूंक लागिल्ल्यान वाळपय सरकारी समाजीक हॉस्पिटल सतर्क जालां. सद्या जाग्याजाग्यांनी फॉगींग आनी जनजागृताय करपाचेर भर दीत आसात. जोर आयल्यार रोखडोच दोतोरा कडेन संपर्क सादून तपासणी करून घेवची अशे तरेचे आवाहन भलायकी खात्या वतीन केलां. तशेंच भलायकी मंत्री विश्वजीत राणे हांणी लेगीत जोर आयल्यार रोखडोच दोतोरा कडेन संपर्क सादचो अशें आवाहन केलां.
वाळपय सरकारी समाजीक हॉस्पिटलांत दोन डेंग्यू दुयेंतीची नोंद जाल्या. पूण हे दुयेंती कांदोळी वाठारांत कामाक वतात. ह्या वाठारांत तांकां डेंग्यूची लागण जाल्ल्याचें स्पश्ट जालां. पूण थळाव्या पांवड्यार अजून मेरेन एकूय दुयेंती सांपडिल्लो ना. तरी लेगीत डेंग्यूच्या दुयेंसा संबंदी जनजागृती जावची हे विशीं सगले तरेची काळजी घेवपा खातीर समाजीक हॉस्पिटल सतर्क जालां.
हे विशीं हॉस्पिटला कडेन संपर्क सादलो तेन्ना तांणी सांगलें आतां मेरेन सत्तरी म्हालांतल्या खूबशा गांवांनी डेंग्यू दुयेंसा संबंदी जनजागृतीच्यो कार्यावळी हातांत घेतल्यात. जोर आयल्यार कसली खबरदारी घेवची हे विशींची म्हायती दुयेंतींक दिल्ल्याचे अधिकाऱ्यांनी सांगलें. खूबशा गांवांनी घेतिल्ल्या कार्यावळींनी बरो प्रतिसाद मेळ्ळो अशें अधिकाऱ्यांनी स्पश्ट केलें.
मजगतीं, जंय जळारांची पैदास वाडल्या थंय व्हड प्रमाणांत फॉगींग प्रक्रिया हातांत घेतल्या. जळारांचेर नियंत्रण दवरपा खातीर जतनाय घेतल्या. लोकांनी आतां मेरेन बरो प्रतिसाद दिला फुडारांतूय अशेच तरेचें सहकार्यकरचें अशी विनंती हॉस्पिटलाचे यंत्रणेन केल्या.
ह्या हॉस्पिटलांत दोन डेंग्यूच्या दुयेंतींची नोंद जाल्या. पूण अधिकाऱ्यांचे म्हायती प्रमाण हे दुयेंती हे सरकारी नोकर आसात. ते सद्यातरी कांदोळी वाठारांत कामाक आसतात. ह्या वाठारांत डेंग्यू दुयेंतींचे संख्येंत वाड जावंक लागिल्ल्यान ह्या दोगांकूय डेंग्यूची लागण जाल्ल्याचो अधिकाऱ्यांचो दावो आसा. पूण थळाव्या पांवड्यार अजून मेरेन एकूय दुयेंती सांपडूंक नाशिल्ल्याचें तांणी ह्या वेळार सांगलें.
मजगतीं, 2 ऑक्टोबर दिसा सत्तरी म्हालांत खूबशा गांवांनी व्हड प्रमाणांत नितळसाणीची मोहीम हातांत घेतले. हे मोहिमेंत व्हड प्रमाणांत लोकांनी वांटेकार जावचें अशी विनंती भलायकी मंत्री विश्वजीत राणे हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
