वर्साभितर भाऊसायबांच्या यादस्तीकाचें नुतनीकरण ः मुख्यमंत्री सावंत
भांगरभूंय | प्रतिनिधी
पणजी ः गोंयचे पयले मुख्यमंत्री भाऊसायब बांदोडकार हांच्या यादस्तीक स्थळाचे नुतनीकरण फुडल्या तीन ते चार म्हयन्यांत सुरू जातलें आनी एक वर्सा भितर पुराय करतले. भाऊसायब हे फुटबॉल मोगी आशिल्ले. देखून तांच्या 50 व्या पुण्यतिथये निमतान फुडल्या तीन म्हयन्यांत गोंय फुटबॉल संघटने वरवीं भाऊसायब बांदोडकार यादस्तीक फुटबॉल सर्त घडोवन हाडटले अशी म्हायती मुख्यमंत्री डॉ. प्रमोद सावंत हांणी दिली.
भाऊसायब हांच्या 50 व्या पुण्यतिथये निमतान डॉ. सावंत हांणी मिरामारच्या यादस्तीक स्थळार वचून तांकां आर्गां ओंपलीं. ह्या वेळार वीज मंत्री सुदीन ढवळीकार आनी भाऊसायबांचें कुटुंब हाजीर आशिल्लें.
भाऊसायब खऱ्या अर्थान गोंयचे शिल्पकार आशिल्ले. तांणी आपल्या कार्यकाळांत केल्ली राज्याची उदरगत फुडल्या वर्सा वेगवेगळ्या कार्यावळीं वरवीं लोकां मुखार मांडटले. भाऊसायबान गरीब आशिल्ल्या लोकांक बरें शिक्षण मेळचें म्हूण शिक्षणाचो थर उबारपा खातीर वावर केलो. तांणी सरकारी शाळा सुरू करून गोंयच्यो जायत्यो पिळग्यो घडयल्यो. देखून वायट स्थितींत आशिल्ल्या सगल्या सरकारी शाळांचें नुतनीकरण करपाचें काम अंदूं पुराय जातलें, अशेंय आश्वासन मुख्यमंत्र्यान दिलें.
मजगतीं, शेतकी मंत्री रवी नायक हांणी फोंडेंच्या भाऊसायबांच्या पुतळ्याक आर्गां ओंपलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
