लोकसभेर उत्कृश्ठ जाय

भांगरभूंय | प्रतिनिधी

विखुरील्लीं पानां-  42

धावी, बारावेचे परिक्षेचे दीस. सर्त दोतोर आनी इंजिनियर जावपाक. विज्ञान, अर्थशास्त्र, कला आनी कौशल्यांची दुसरींय मळां उगतीं आसात, पूण निमणी संद उत्कृश्ठांक. गोंयच्यान लोकसभेर आतां उत्कृश्ठ उमेदवार धाडप, संवाद, शिक्षणांतल्यान बरें तें राज्यांत हाडूंक सोदतल्यांक उमेदवारी, वेंचून दिवपाची मोख कोणाची?

पेडणें तें काणकोण मेरेन लोकां मेरेन वचून प्रदेश भाजपाक विधानसभा, लोकसभेर पावोवपी केंद्रीय मंत्री श्रीपादभाऊ. राज्यांत मुख्यमंत्रीपद, केंद्रात गृहमंत्री वा हेर व्हड खातीं मेळिल्लीं नासत, पूण निर्शेणी ना. पक्षा कडेन एकनिश्ठ रावन ते वावुरिल्ल्यान गोंयच्या पयल्या, आज मेरेन केंद्रांतल्या भाजप आघाडी सरकारांत पावले. पक्षाचेर आशिल्ली तांची निश्ठा, अणभव, शिक्षण, वेंचणूक जिखपाची तांक उत्तरेंत भाजपाक उपेगाची. काँग्रेसीचें अजून थारनाशिल्ल्यान उत्तरेंत तशे भाऊ एकलेच. हुस्को दक्षिणेचो, सर्तींत प्रदेश काँग्रेस, भाजपाचे एकापरस चड इत्सुकय आसात. तातूंतले युवा आनी ज्येश्ठांक भावपी उत्कृष्ठाक केंद्रीय समिती कडेन पावोवन “पोल ऑफ पोल्स” फट थारावपाक भाजप तयार जाता. 

एका तेंपार शेतकी मंत्री रवी नायक हांचेआड मडकय विधानसभा वेंचणुकेंत श्रीपादभाऊ झुजून जायंट किलर थारिल्ले. अंदूं ते लोकसभा वेंचणुकेंत जायंट किलर कित्याक थारचे न्ही?

सत्तेंत तांच्याच पक्षाचें सरकार, कळाव कित्याक? अस्तंत बंगालांत सत्तेंत आशिल्लें सरकार वरिश्ठ पत्रकार, स्तंभलेखक सागरिका घोष राज्यसभेर धाडपाचे वांटेर आसा.   

स्थलांतर (मायग्रेशन) हो विशय ऐन वेंचणुके वेळार पेटोवन घालपीय आसतलेच.  ते कोण हें मतदारांक सांगपाचो वावर पत्रकारांचोय. खासदार म्हणून वावुरतना भाजपाचे भाऊ हिरो, झिरो नाशिल्ले पूण क्रियाशिल. ताचो नियाळ संसदेच्या वेव्हाराची पानां फाटीं फुडें केल्यार मेळटलो.       

राजकारणांत इश्ट, दुस्मान आसतात, नासतातय. भाऊन दुस्मानां परस इश्ट जोडल्यात सगल्या राजकी पक्षांतल्यान. तेच एकादरे तांकां अंदूं जायंट किलर करपीय आसतले. वेंचणुके वेळार दुस्मानकाय तकली वयर काडटा ती निमाण्या खिणाक, रातीय दुस्मानाच्यो आसतात.  उमेदवारी खातीर हेवटेन तेवटेन वचपी एकनिश्ठय आसतात, तेच पक्षनिश्ठेक, पिरायेक, शिक्षणाक, अणभवाक म्हत्व येवपाक लागलां. राजस्थान, मध्य प्रदेश, छत्तीसगढ, महाराष्ट्र राज्यांतल्यो वेंचणुको उत्कृष्ठांक (मुखेल करुन शिक्षण, राजकारणांतल्या अणभवाक), तरनाट्यांक, स्त्रीशक्तीक लोकसभेर धाडटल्यो. आदीं राज्यसभा घटमूट करपाचें राजकारण नेटार आसा. राजकारणांत नितळ, नवे चेहरे आसल्यार उमेद वाडटली, मतदानय वाडटलें.

विखुरिल्ले काँग्रेसीचो लाव आम आदमी पार्टी घेतली पूण जैत मेळोवपाक आठ न्हय वीस मतदारसंघां मेरेन पावपी उमेदवार जाय. वेंचणूक जिखपाचीं गणितां मांडटना उमेदवारांक वेंचून हाडपाची तांक आम आदमी पार्टी गोंय फांट्याचे निमंत्रक अमीत पालेकार हांचे लागींय आसा काय ना हें कळटलें. आप गोंय फांट्याचे पयलींचे निमंत्रक राहुल म्हांब्रे परतून प्रचारांत दिसत व्हय? कोणाच्या? आम आदमी पार्टी काय भाजपाच्या? अमीत पालेकार हांची आवय ज्योती पालेकार आपच्यो स्त्रीशक्ती जायत? पंच, सरपंच, जिल्लो पंचायत वेंचून येवपी ज्योतीताई वेवसाय, उद्येगांत, नारीशक्तीक बळ दिवपी. तांच्या मोलादिक वावराचो उपेग आम आदमी पार्टी करुन घेत? ही लोकसभा वेंचणूक म्हत्त्वाची नारीशक्ती खातीर. केंद्रातलें आनी गोंयचें अदमासपत्रक फुडारांत स्त्रीशक्तीक मुखार दवरुन जातलें. जें आतां मांडलां तें तात्पुरतें (इंटेरिम), टॅक्स आज घालूंक ना पूण फुडें येवचें ना अशें न्हय. 

उदक, लायट बिलांची माफी दिवपाच्यो घोशणा लोकसभा वेंचणुकेंतय जातल्यो.  शिक्षणान, आरोग्यान, पैशांनी सशक्त, बळिश्ट स्त्रीशक्ती खातीर लाडली आसची. गोंय स्वयंपूर्ण, आत्मनिर्भर करपाक स्त्रीशक्ती आजय शेतांत देंवता तेन्ना तांचे खातीर रातीचें शिक्षण दिवपाची वेवस्थाय जावची. 

श्रीपादभाऊंक एकवटान वेंचणुकेंत जिखून हाडपा खातीर राजकारण मुख्यमंत्री प्रमोद सावंत खेळत व्हय? रातयां विरोधी आमदार, खासदारांची बिटकी कवळून एअर लिफ्ट करपाचें  राजकारण नवें. केंद्रीय मंत्रीपदाचें बक्षीस राज्यसभेंतल्यान केन्ना अचकितय येता, लोकसभा वेंचणुकेंतल्या बऱ्या वावराची पावती केंद्रांतय पावयता.  कवितेक कवितेंतल्यान जाप दिवपीय लोकसभेर वतात.  

लोकसभेंत मतदान 100  टक्के जावचें हे खातीर जागृताय जावपाक लागल्या, उत्कृश्ठ खासदार मेळचे म्हणून पत्रकारांनी मतदारांक जागे करपाक जाय. हातांत बातमी नासता तेन्ना त्यो घडोवच्यो, पिकोवच्योय पडटात, अजूनय तें जाता. सभापती, मंत्री, आदले मंत्री, मुखेलमंत्र्यांक हातालागीं धरून ? जेन्ना बातम्यो समाजीक तंटे घडोवपी आसतात तेन्ना फुडारी, बातमीदारांनी एकठांय कित्याक येवचे न्ही? माफीचें, उजो पेटोवपाचें, पालोवपाचें राजकारण वेंचणुकेत जातलें तेन्ना सादूर रावचें. भितरली बातमी, भायली खबर, अंदर की बात, गोंय, गोंयकारपण करतना कागाळ नाका. 

सुहासिनी प्रभुगांवकार