भांगरभूंय | प्रतिनिधी
नवी दिल्ली, खबरां संस्था: अर्थमंत्री निर्मला सीतारमण हांणीं संसदेंत अंतरीम अर्थसंकल्प सादर करतना काल केंद्राच्या विवीध येवजण्यांचो उल्लेख केलो. समाजीक बदलांचेर टिप्पणी करतना लोकसंख्येच्या आव्हानां विशीं आपूण विचार करतां अशें तिणें सांगलें. ह्या वेळार तिणें लोकसंख्या वाड आनी लोकसंख्येच्या बदलाच्या आव्हानांचो अभ्यास करपा खातीर समितीची नेमणूक करपाची घोशणा केली. हे समितीक उंचेले अधिकार आसतले. तशेंच ह्या आव्हानांक तोंड दिवपा खातीर ही समिती सरकाराक शिफारशी करपाक शकता अशेंय तांणी स्पश्ट केलें.
लोकसंख्येची वाड आनी बदलाक लागून निर्माण जावपी आव्हानांक तोंड दिवपा खातीर सरकार उच्चधिकारी समिती स्थापन करतलें. समाजीक बदल मतींत दवरून सरकार हो प्रस्ताव तयार करता. अशा आव्हानांक तोंड दिवपा खातीर समिती आपल्यो शिफारशी दितली अशें अर्थमंत्री सीतारमण हांणी सांगलें.
विशेश म्हळ्यार सध्या देशाची लोकसंख्या १४० कोटी परस चड आसा. लोकसंख्येच्या मळार भारत संवसारांत पयल्या क्रमांकाचेर पावलां. फाटल्या वर्सा भारतान चीनाक फाटीं घालून लोकसंख्येच्या मळार पयलो क्रमांक मेळयलो. लोकसंख्येची वाड फुडाराक भारता खातीर एक कठीण समस्या जावंक शकता. ही गजाल मतींत दवरून सरकारान एक समिती घडयल्या अशें तांणी फुडें सांगलें.
अर्थमंत्रीन लोकसंख्येंतल्या बदलाचो उल्लेख केलो. लोकसंख्येच्या असंतुलना वरवीं सरकारान दोन म्हत्वाच्या गजालींचेर लक्ष केंद्रीत केलां अशें तांणी सांगलें. हालींच्या काळांत वाडपी लोकसंख्येचेर नियंत्रण हाडपा खातीरचो प्रस्न खरपणान मांडलो. सत्ताधारी पक्षा वांगडाच विरोधकांनीय ताका तेंको दिलो. देखून अर्थमंत्री निर्मला सीतारमण हांची ही घोशणा म्हत्वाची मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
