भांगरभूंय | प्रतिनिधी
कनेक्टिविटीक लागून गोंय जातले नामनेचे लॉजिस्टिक हब
पणजी, प्रतिनिधी : विमानतळ, रेल्वे, बंदर आनी राष्ट्रीय म्हामार्गाक लागून गोंय हें नामनेचें लॉजिस्टिक हब जातलें. लाॅजिस्टीक हबा खातीर आतां सावन मनिसबळ तयार करपाचो वेळ आयला. सीआयआयन तें तयार करपा खातीर फुडाकार घेवचो, अशे आवाहन मुख्यमंत्री डॉ. प्रमोद सावंत हांणी केलें.
पणजे सीआयआयचे लॉजिस्टिक परिशदेच्या उक्तावणा उपरांत ते उलयताले.
गोंय हें ल्हान राज्य आसलें तरी कनेक्टिव्हिटी हेर राज्यां परस बरी आसा. संवसारातंलें नामनेचें लॉजिस्टिक हब जावपाची तांक गोंय राज्या कडेन आसा. लॉजिस्टिक हब जावपा खातीर कुशळ मनीसबळाची गरज आसा. स्किलिंग, अपस्किलींगाच्या आदारान मनीसबळ तयार करपाची गरज आसा. लॉजिस्टिक वाठारांत करियर करपाची तरणाट्यांक व्हड संद आसा. प्रधानमंत्री गती शक्ती येवजण तशेंच हेर येवजणेंच्या आदारान मुळाव्या सुविधांची उबारणी सुरू आसा. दुद, भाजी, नुस्तें तशेंच हेर म्हालाची निर्गत करपाची तांक गोंया कडेन आसा. लॉजिस्टिक हब जाले उपरांत म्हाल निर्गत तशेच हेर उद्देगांक उर्बा मेळटली. देशाच्या दरडोई येणावळींत लॉजिस्टिक उद्देगाचो वाटो 13 ते 14 टक्के आसा. फुडल्या काळांत हातूंत निश्चित वाड जातली. विकसित भारत आनी विकसीत गोंय करपाक लॉजिस्टिक उद्देगाचो वांटो आसपाक जाय, अशें मुख्यमंत्री सावंत हांणी सांगलें. परिशदेंत तरेकवार विशयांचेर चर्चा सत्रां सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
