भांगरभूंय | प्रतिनिधी
म्हापशें: मानसवाडो, रेवोड्यां अलेक्झांडर डिसोझा (70) हांकां पडींग शेतांतल्या उदकांत पडून बुडून मरण आयलें. ही घडणूक सोमारा सांजवेळा 3.45 वरांच्या सुमाराक घडली.
मयत अलेक्झांडर हे सदचे प्रमाण 3.30 वरांचेर चलपा खातीर घरांतल्यान भायर सरिल्ले. पंदरा मिणटांनी मयताचे घरकान्नीक ते घरा मुखा वेले पडींग शेतांत पडिल्ले नदरेक आयलें. मयताचे घरा पसून 50 मिटराचेर हें शेत आसून पावसाचें उदक तातूंत सांचिल्लें. घरकार उदकांत पडिल्ले नदरेक येतकूच तांणी बोवाळ घालो आनी घडणूक थळार धांव घेतली. तेच बरोबर शेजारचे लोकूय थंय एकठांय जाले. तांणी अलेक्झांडर हांकां उदकांतल्यान भायर काडले. तो मेरेन तांकां मरण आयिल्लें.
घडणुकेची म्हायती मेळटकूच कोलवाळ पुलीस उपनिरिक्षक कुणाल नायक हांणी पुलीस पंगडा सयत घडणूक थळार धांव घेवन पंचनामो केलो.
मयताक रक्तदाबाचें दुयेंस आशिल्लें. सोमारा सकाळीं टिटो कोलवाळे रक्तदाब उणो जाल्ल्यान घुंवळ येवन ते पडिल्ले. ताका लागून तांचो चलता आसतना परतून रक्तदाब उणो जाल्लो आसुये आनी ते उदकांत पडले आनी थंयच तांकां बुडून मरण आयलें आसुये असो दुबाव लोकांनी उक्तायलो. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
