भांगरभूंय | प्रतिनिधी
चलून वचप्यांक, दुचाकी चालकांक थारलां त्रासाचें
वास्को: पावसाच्या उदकाचो योग्य तरेन निचरो जायत नाशिल्ल्यान तानिया हॉटेला मुखा वेल्या रेल्वे उड्डाण पुला सकयल्या रस्त्यार उदक सांचूंक लागलां. ताका लागून चलून वचप्यांक आनी दुचाकी चालकांक त्रासदायक थारलां. ह्या प्रकरणांत मुरगांव पालिकेन योग्य तीं पावलां उबारपाची गरज लोकांनी उक्तायल्या.
ह्या उड्डाण पुला सकयल्या रस्त्यार पयलीं व्हड प्रमाणांत पावसाचें उदक सांचून उरतालें. मजगतीं, आदले आमदार कार्लुस आल्मेदा हांणी थंय पावसाच्या उदकाचाे निचरो जावचो हे खातीर योग्य तीं पावलां उबारिल्लीं. ताका लागून पुला सकयल्या रस्त्यार उदक सांचून उरपाचो प्रकार बंद जाल्लो. पूण पावसाच्या दिसांनी आतां परतून रस्त्यार उदक सांचूंक लागलां.
रेल्वे मार्गा लागसारच्या गटारांतल्यान येवपी उदकाचो योग्य निचरो जायनाशिल्ल्यान तें उदक पुला सकयल्या रस्त्यार सांचून उरूंक लागलां. त्या रस्त्या कुशीच्या गटाराची योग्य ती नितळसाण करूंक नाशिल्ल्यान उदकाचो निचरो जायना. थंय सांचिल्ल्या उदकांतल्यान मोटारी आनी हेर वाहनां गतीन गेल्यार चलून वचप्यांच्या वा दुचाकी चालकांच्या आंगार उदक उसळटा. उदक सांचून उरूंक लागिल्ल्यान थंयच्या पेव्हर्साची समपातळी इबाडूंक लागल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
