भांगरभूंय | प्रतिनिधी
भांगरभूंय । खबरां मेज
पणजीः गोंय मुक्तीच्या 62व्या वर्धापन दिसानिमतान गोंयांत रिजनरेटिव्ह टुरिझमाक सुरवात केल्या. पर्यटन मंत्री रोहन खवंटे आनी पर्यटन संचालक आनी गोय पर्यटन उदरगत म्हामंडळाचो वेवस्थापकीय संचालक सुनील अंचिपाका हाणी ते संबंदीची घोशणा केली. रिजनरेटिव्ह टुरिझम (पुनर्संचयीत पर्यटन) सुरू करपी भारतांतलें पयलें राज्य थारपाचो मान गोंयांत फावो जाला. अधात्म, स्वदेशिता, सभ्यता आनी सांस्कृतीक राष्ट्रवाद तशेंच जागरूक पर्यटन ह्या चार मार्गां वरवीं समुदाय सशक्तीकरणाक उर्बां दिवंन भारतीय पर्यटन उद्देगाक नवें रूप दिवप व्हो रिजनरेटिव्ह पर्यटनाचो हेत आसा. 1980च्या संवसारीक पर्यटनाचे मनिला घोशणापत्र आनी हालींच जी-20 पर्यटन मंत्र्यांच्या कार्यगटाची गोंयांत जाल्ली बसका शाश्वत पर्यटन उदरगतींचो हेत साध्य करपा खातीर गोंय पर्यटन रोडमॅप तयार केला. ताच्या वरवीं गोंयांतलें तशेंच भारतीय पर्यटनांतली शाश्वत पर्यटन उदरगतीचीं सगळीं मानांकना हातासपाचो यत्न जातले.
एकादश तीर्थाच्या शुभारंभा सयत आमी भारतीय पर्यटनाक एक नवें रूप आनी दिका दितलें. अधात्म, स्वेदेशिता, सांस्कृतीक आनी सांस्कृतीक राष्ट्रवाद हाचेर रिजनरेटिव्ह पर्यटना वरवीं चड भर दितले. हजारांनी वर्सांत भारतीयांनी प्रवास आनी तीर्थयात्रां वरवीं तांच्या भुगोलीक गिन्यानाचो विस्तार केला. स्वताक प्रादेशिकता आनी संकुचीत बंदनातल्यान मुक्त केलां. अशें पर्यटन मंत्री रोहन खवंटे हाणे सांगलें. आमी ज्या पर्यावरण, संस्कृती आनी समुदायां कडेन संवाद सादतात तातूंत सकारात्मक बदल घडोवन हाडपा खातीर आनी बांदील आसात. पर्यावरण आनी लोकांक लाब मेळपी पर्यटन मळाक उर्बां दिवपाचे मॉडेल सादर करपाचें आमचें उद्दिश्ट आसा अशें ताणे फुडें सांगलें.
जें पर्यटन ताचें वर्तमान आनी फुडाऱांतली अर्थीक, सामाजीक आनी पर्यावरण प्रभावाचो लेखाजोखा घेता. हॉस्टिटॅलिटी उद्देग, पर्यावरण आनी लोकांच्यो गरजो पुराय करता तें रिजनरेटिव्ह टुरिझम अशी संयुक्त राष्ट्र संघाची संवसारीक पर्यटनाची व्याख्या आस. एकादश तीर्थ म्हणल्यार अध्यात्मिक थळांच्या आशिकुशीच्या लोक समुदायां कडेन चर्चा करून पर्यटन विभागा वतीन आध्यात्मिक थळां निश्चीत करतले अशें खवंटेन सांगलें.
अतिथी आनी येजमान हाचे मदीं परस्पर आदर आनी भोवमान विकसीत करप ही रिजनरेटिव्ह पर्यटनांतली मुखेल गजाल आसतली. व्हो पर्यटन प्रकल्प आमचो ही भावना आसप चड म्हत्वाचें आसा. एकादश तीर्थ उपक्रमांत थळाव्यो बायलो आनी तरणाट्यांक वेवसायीक भागिदार करून घेतले. पर्यटन मळार नवे बदल घडोवन हाडपा खातीर पर्यटन वेवसायीक आनी हेर संबंदितां कडेन आमी चर्चा करतले अशें पर्यटन संचालक आनी गोंय पर्यटन उदरगत म्हामंडळाचो वेवस्थापकीय संचालक सुनील अंचिपाका हाणे सांगलें.
मुक्ती उपरांतच्या दशकांनी गोंयांत आपल्या इतिहासीक संवसारीक संबंदांचो आनी अर्थीक वाडी खातीर सैम सोबीत दर्या देगांचो उपेग करून पर्यटनाक धोरणात्मक रितीन आपणायलां. ताका लागून गोंय हे संवसारीक पर्यटन थळ म्हणून फामाद जालां. कोवीड म्हामारी उपरांत थायलंड, मलेशिया आनी इंडोनेशिया सारक्या देशां कडेन तशेंच भारतांतल्या व्हडल्या शारां कडेन मेळपी आव्हानांत तोंड दिवंन गोंयांत पर्यटन मळार आपली अशी खाशेली सुवात तयार केल्या अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
