भांगरभूंय | प्रतिनिधी
भांगरभूंय । खबरां संस्था
नवी दिल्ली: मोदी आडनांव बदनामीच्या खटल्यांत गुजरात उच्च न्यायालयान दिल्लो निर्णय रद्द करीत सर्वोच्च न्यायालयान राहुल गांधी हांकां थाकाय दिल्या. राहुल गांधींचो संसदेंत परतपाचो मार्ग ह्या निर्णयाक लागून मेकळो जाला. ‘हायकोर्टान राहुल गांधीक ख्यास्त दितना पुरायेन विचार करूंक ना’ अशें सर्वोच्च न्यायालयान म्हणलां. ‘राहुल गांधी हांणी केल्लें वक्तव्य योग्य नाशिल्लें. भौशीक जिणेंत उलयतना हाचें मुखार सगल्यांनीच भान दवरचें’ अशेंय सर्वोच्च न्यायालयान म्हणलें.
दोन वर्सांची ख्यास्त
मोदी आडनांवाची मानहानी केल्ले खातीर राहुल गांधी हांकां गुजरातच्या उच्च न्यायालयान दोन वर्सांची ख्यास्त दिल्ली. उपरांत लोकसभा सचिवालयान राहुल गांधींची खासदारकी रद्द केल्ली. ह्या निर्णया आड राहुल गांधी सर्वोच्च न्यायालयांत गेल्ले. सर्वोच्च न्यायालयान तांचे शिक्षेक स्थगिती दिल्ल्यान राहुल गांधी हांकां तांची खासदारकी परत मेळटली.
राहुल गांधीं हांकां गुजरात न्यायालयान सगळ्यांत चड आशिल्ली दोन वर्सांची ख्यास्त दिल्ली. ताची खासदारकी रद्द जावची म्हणून ती दिल्ली काय? ताचे परस एका दिसाची ख्यास्त जरी उणी आसली तरी तांची खासदारकी रद्द जावची नासली. ह्या प्रकरणांत दोन वर्सांची ख्यास्त दिल्ली. हाचे फाटल्यार कसलो हेत आशिल्लो काय? असो प्रस्न सर्वोच्च न्यायालयान विचारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
