भांगरभूंय | प्रतिनिधी
भांगरभूंय । प्रतिनिधी
मडगांव : गोवा फुटबॉल डेव्हलपमेंट कॉर्पोरेशनच्या (जीएफडीसी) प्रशिक्षकपदार नेमणूक केल्ल्या रॉबर्ट फर्नांडीस हांकां फाटल्या तीन वर्सां सावन पगार दिवंक ना. गोंयां खातीर आनी राष्ट्रीय पांवड्यार खेळिल्लो फुटबॉलपटू सध्या अर्थीक त्रासांत आसा. जीएफडीसीन पगार दिवपाची मागणी तांणी केल्या.
रॉबर्ट फर्नांडीस हांची जीएफडीसी 2016 त प्रशिक्षक पदाचेर नेमणूक जाली. उपरांत ताची 2020 त प्रशिक्षकपदार परत नेमणूक केली. उपरांत जीएफडीसी कडल्यान एक आदेश जारी करून मानधन उणें केलें. फाटल्या तीन वर्सां आपल्याक पगार मेळूंक ना. ताका लागून खुबश्यो अर्थीक आडखळी येतात. जीएफडीसीन पगार उणो केल्ल्यान तो आदेश स्विकारूंक ना. ताका लागून प्रशिक्षक म्हणून काम करूनय फाटलीं तीन वर्सां जालीं आपल्याक पगार मेळूंक ना. पगारा संबंदी जीएफडीसीच्या वेवस्थापना कडेन ईमेल, फोना वरवीं संपर्क केलो. पून आजूनय कांयच जावंक ना अशें तांणी सांगलें.
जीएफडीसीचे आदले वांगडी सचीव ऑलेंसिओ कॉस्ता हांणी, रॉबर्ट फर्नांडीस गोंयां खातीर, राष्ट्रीय पांवड्यार फुटबॉल खेळ्ळा. तांकां गोवा फुटबॉल डेव्हलपमेंट कॉर्पोरेशना कडल्यान तीन वर्सांचो पगार मेळूंक नाशिल्ल्याचें कळटकच खूब वायट दिसलें. माणुसकेचे नदरेन विचार करपाची गरज आशिल्ली. रॉबर्ट हे साळगांवकर क्लबा खातीर 11 वर्सां फुटबॉल खेळ्ळ्यात. ते एशियन गेम्सांत भारताच्या फुटबॉल टिमीचे कॅप्टन आशिल्ले. ते 12 फावटीं भारतीय संघा खातीर खेळ्ळ्यात. गोंयां खातीर पांच फावटीं खेळ्ळ्यात. 2020 त तांची म्हयन्याक 53 हजार रुपया पगाराचेर नेमणूक केल्ली. उपरांत तातूंत निम्म्यांन उणाव जालो. तशेंच फाटल्या 36 म्हयन्यांचो पगार दिवंक ना. कुटुंबांत ते एकटेच जोडपी आनी तांची भुरगीं शिकतात. हे नदरेन विचार करून तांचो पगार बेगीन दिवचो, अशे काॅस्ता हांणी सांगलें.
जीएफडीसीच्या कार्यकारिणीचेर आशिल्ल्या पदाधिकार्यांनी आनी रॉबर्ट हांचे वांगडा खेळिल्ल्या खेळगड्यांनी एक उत्कृश्ठ खेळगडो म्हणून फर्नांडीस हांचो मान राखपाची गरज आसा. ह्या मंडळाची हे विशीं चवकशी जावप गरजेचें. राज्य सरकारान चवकशी करून रॉबर्ट फर्नांडीस हांकां न्याय मेळोवन दिवचो अशी मागणी कॉस्ता हांणी केली.
हे विशीं जीएफडीसी अध्यक्ष ब्रह्मानंद शंखवाळकार हांचे कडेन संपर्क केलो तेन्ना तांणी ह्या विशयाचेर योग्य वेळ येतलो तेन्ना उलयतलों अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
