भांगरभूंय | प्रतिनिधी
भांगरभूंय । खबरां संस्था
अयोध्या : अयोध्येंत सध्या राम मंदिराचें बांदकाम सुरु आसा. राम मंदिराच्या कामा खातीर खुबशे जाण मजत करतात. तेच प्रमाण उत्तरप्रदेश, अलीगढच्या एका कारागिरान राम मंदिरा खातीर 400 किलो वजनाचें कुलूप तयार केलां. तांणी तें तयार करपा खातीर खूब मेहनत घेतल्या. हें कुलूप करपाक तांणी आपली पुराय जोड खर्च केल्या. सत्य प्रकाश शर्मा अशें ह्या कारागिराचे नांव. सध्या ह्या 400 किलोच्या कुलुपाक लागून ते चर्चेंत आसा.
जानेवारी 2024 त राम मंदीर भाविकां खातीर उक्तें जावपाची शक्यताय आसा. रामाचे भक्त आशिल्ल्या अलिगढच्या सत्य प्रकाश शर्मा हांणी संवसारांतलें सगळ्यांत व्हड 400 किलो वजनाचें कुलूप स्वताच्या हातांनी तयार केलां. सत्य प्रकाश शर्मा ह्या वर्साच्या निमाणे कडेन हें कुलूप राम मंदीर वेवस्थापनाक भेट दिवपाचो विचार करतात.
रामजन्मभुमी तिर्थ क्षेत्र ट्रस्टाच्या एका अधिकार्यान सांगलें, देवस्थाना खातीर खूब भेटवस्ती आयिल्ल्यान तांचें कुलूप खंय वापरपाक मेळटलें हें पळोवचें पडटलें.
सत्य प्रकाश हांणी तांचे पुर्वज एका शेकड्या परस चड काळ जालो हातांनी कुलूप तयार करता. राम मंदिराचो विचार करून चार फुटांचे चावयेन उघडपी व्हड कुलूप तयार केलां. हें कुलूप 10 फूट उंच, 4.5 फूट रूंद आनी 9.5 इंच जाड आसा अशी म्हायती तांणी दिली.
सत्य प्रकाश शर्मा हांचे वांगडा तांची घरकान्न रुक्मिणी देवी हांणी हें कुलूप करपाक तांची मजत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
