भांगरभूंय | प्रतिनिधी
म्हालांतल्या सगळ्या पंचायतींक निर्देश
वाळपय, प्रतिनिधी : सत्तरी म्हालांतल्या खुबश्या पंचायतींनी आशिल्ले रान हक्क प्रस्ताव २६ जानेवारी आदीं निकालांत काडचे. ताका लागून खासा ग्रामसभा आयोजीत करची अशे तरेचे निर्देश सत्तरी म्हालाचे गटविकास अधिकारी सूर्याजीराव राणे सरदेसाय हांणी सत्तरी म्हालांतल्या सगळ्या पंचचायतींक दिल्यात. ताका लागून २६ जानेवारी पयलीं हाचेर निर्णय घेवचे अशें स्पश्ट केलें. ताका लागून आतां सत्तेंतल्या सगळ्या पंचायतींनी हे विशींच्या ग्रामसभेचे आयोजन केलां अशी म्हायती उपलब्ध केल्या.
हे विशीं म्हायती अशी, सत्तरी म्हालाच्या जायत्या पंचायतींनी वन हक्क प्रस्ताव सादर केल्लें. कांय पंचायतींनी हाचेर विशेश हालचाल करून ताका मंजुरी दिल्या. जाल्यार जायत्या पंचायतींनी हे विशीं आजूनय हालचाली करूंक ना. मुख्यमंत्री प्रमोद सावंत हांणी जात तितले बेगीन रान हक्क प्रस्तावाचेर निर्णय घेवचे अशे तरेचे निर्देश दिल्यात. हे फाटभूंयेर सत्तरी म्हालांतल्या सगळ्या पंचायतींनी हे विशींचे निर्देश दिल्ल्याची म्हायती गटविकास अधिकारी सूर्याजीराव राणे हांणी प्रस्तूत पद्धतीन उलयतना दिली.
७०० दावे अजूनय निकालांत हाडूंक ना
गटविकास अधिकारी सूर्याजीराव राणे हांणी, सत्तरी म्हालांतल्या खुबश्या पंचायतींनी सुमार ७०० रान हक्क प्रस्ताव आसात. ताचेर अजूनय निर्णय घेवंक ना. कांय प्रस्तावांचेर आदीं मंजुरी मेळ्ळ्या. मात ते विशीं कागदपत्रांचें काम पुराय करून हो प्रस्ताव सरकाराच्या संबंदीतां कडेन धाडप गरजेचें. मात हाचेर आजूनय ही प्रक्रिया करूंक ना. हो प्रस्ताव रोखडोच मंजुरी खातीर धाडचो. अशे तरेचे निर्देश दिल्ल्याचे ह्या वेळार राणे हांणी सांगलें.
रान खात्या वतीन ह्या प्रस्तावांत निर्देशीत केल्ले जमिनीचें सर्वेक्षण आनी अहवाल सादर केल्यात. तांकां विशेश ग्रामसभेंत मंजुरी मेळ्ळ्या. मात हे जमिनींच्यो सनदा मेळोवपाचे नदरेन हे दावे उपजिल्हाधिकार्यांक धाडप गरजेचें. पूण ही प्रक्रिया आजूनय जायत्या पंचायतींनी करूंक ना अशें तांणी फुडें सांगलें.
नव्या प्रस्तावाचोय जातलो निर्णय
हे विशीं चड म्हायती दितना गटविकास अधिकार्यांन सांगलें, रान हक्क कायद्या खाला जायत प्रस्ताव खुबश्या पंचायतींनी सादर केले. हांतल्या कांय प्रस्तावांचेर आजूनय रान खात्यान आपलो सर्वेक्षण अहवाल सादर करूंक ना. जाल्यार कांय प्रस्तावांचेर सर्वेक्षण अहवाल सादर केलो. पूण हाचे खातीर ग्रामसभांची मंजुरी मेळप गरजेचें. मात जायत्या सुवातांचेर ही प्रक्रिया पुराय करूंक ना. ही प्रक्रिया बेगीनूच पुराय करची आनी २६ जानेवारी आदीं हे विशीं निर्णय घेवचो, अशे तरेची मागणी विवीध पंचायतींनी केल्या, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
