राज्यांत पावसाचें धुमशेण
भांगरभूंय | प्रतिनिधी
झाडां पडपाचे प्रकार, सरासरी परस चड पावस
पणजी ः राज्यांत फाटल्या दोन दिसां सावन पावसान धुमशेण कांडलां. फाटल्या 24 वरांत राज्यांत 2.50 इंचा परस चड पावस पडला. म्हणल्यार फाटल्या तीन दिसांत सुमार 6 इंच पावसाची नोंद जाल्या. आयज आनी फाल्यां पावस अजून वाडपाची शक्यताय आसा. हवामान खात्यान ऑरेंज अलर्ट दिला.
फाटल्या 24 वरांत दाबोळे 4.60, मडगांव 4.20 आनी हेर कांय वाठारांनी 3 इंचा परस चड पावसाची नोंद जाल्या. अंदूंच्या पावसाच्या हंगामांत 1 जून ते 29 सप्टेंबर मेरेन राज्यांत 128.70 इंच पावस पडलो. हो पावस सरासरी परस ९ टक्के चड आसा. फाटल्या वर्सा ह्याच काळांत 118.8 इंच पावस पडलो.
मजगतीं, बिरेस्तारा रातीं व्हड पावसाक लागून पणजी सयत जायत्या शारांनी, भितरल्या वाठारांनी तशेंच मुखेल रस्त्यांचेर उदक भरले. कांय कडेन झाडां हुमटलीं. आयज सकाळीं पावसाक लागून मोपाच्या मुखेल रस्त्याचेर दाडेश्वर देवळा लागसार रस्त्यार माड पडलो आनी येरादारी जाम जाली. ह्या वेळार पेडणें येरादारी पुलीस निरिक्षक विश्वजीत चोडणकार, वांगडी आनी हेर कर्मचारी घडणुक सुवातेर पावले आनी येरादारी दुसरे वटेनच्यान सुरळीत केली.
जाल्यार आयज सांज वेळार तांबडी माती- सांतिनेझ पणजे रस्त्यार व्हड झाड हुमटून पडलें. त्या वेळार स्कुटरी वयल्यान वचपी स्कुचर चालक जखमी जालो. व्हड दुर्घटना जावपाची टळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
