भांगरभूंय | प्रतिनिधी
भांगरभूंय । प्रतिनिधी
दिवचलः राज्यांतल्या सगल्या सगल्या सरकारी हॉस्पिटलांनी आनी भलायकी केंद्रांत शस्त्रक्रिया करपाची सुविधा तयार करपाचो सरकाराचो विचार आसा. दिवचल, साखळे आनी सत्तरींतल्या भलायकी केंद्रात शस्त्रक्रिया करपा खातीर खाजगी दोतोरांक आपयतले अशें मुख्यमंत्री डॉ प्रमोद सावंत हांणी साखळेच्या भलायकी केंद्रांत भलायकी मंत्री विश्वजीत राणे हांच्या वांगडा दोळे तपासणी केंद्राचें उक्तावण केल्या उपरांत सांगलें.
साखळे भलायकी केंद्रांत आयुष्य हॉस्पिटल आनी जीएमसीची सॅटेलायट ओपीडी सुरू करतले. लोकांक बरे उपचार मेळचे हे खातीर सरकार यत्न करतात मात लोक आपले भलायके विशीं म्हणपाक जाय तितले सादूर आसात अशें दिसना. गांवगिऱ्या वाठारांतले लोक भलायके कडेन आडनदर करतात अशें दिसता अशें मुख्यमंत्र्यान सांगलें.
दोळ्याची शस्त्रक्रिया करपाची सुविधा आशिल्ले साखळी भलायकी केंद्र हें राज्यांतले पयलें केंद्र थारला. उक्तावण कार्यावळीक दिवचलचो आमदार डॉ चंद्रकांत शेट्ये, मयेंचो आमदार प्रमेंद्र शेट, साखळेची नगराध्यक्ष रश्मी देसाय, भलायकी संचालिका डॉ गीता काकोडकार, दोळे विभागाचे मुखेली डॉ उगम उसगांवकार आनी डॉ उत्तम देसाय हाजीर आशिल्ले. तालुक्यांत आशिल्ल्या भलायकी हॉस्पिटलांनी डायलिसीस युनिटां सुरू केल्यांत. गोडेमुताक लागून दोळ्यांची दुयेंसा वाडपाक लागल्यांत. कमी पिरायेचेर कमी दिसपाक लागपाचें प्रमाण वाडला अशें मुख्यमंत्र्यांनी सांगलें.
राज्यांतल्या सगल्या भलायकी केंद्राचोदर्जो वाडोवन थंय भलायकेच्यो सगल्यो सुविधा उपलब्द करून दिवपाचे यत्न चल्ल्यात. ह्या कामाक मुख्यमंत्र्यांची मंजुरी मेळटगीर कामाक सुरवात जातली. उपचारा खातीर लोकांक गोंयां भायर वच्चें पडचें ना. मुंबयच्या टाटा कॅन्सर हॉस्पिटला कडेन कबलात करून गोंयांत कॅन्सराचेर मुफत उपचाराची वेवस्था करतले. ते खातीर भलायकी खात्यान दोतोरांचो पयलो पंगड प्रशिक्षणा खातीर धाडला अशें भलायकी मंत्री विश्वजीत राणे हांणे सांगलें. डॉ शेट्ये आनी प्रेमेंद्र शेट हांणी ह्या वेळार आपले विचार मांडले.
दिवली पेटोवन आनी फीत कापून दोळे तपासणी केंद्राचें उक्तावण केलें. साखळेची भलायकी अधिकारी डॉ अतुल पै बीर हाणे सुरवेक सगल्यांक येवकार दिलो. सूत्रसंचालन डॉ कल्पिता पोतदार हिणे केलें. डॉ गीता काकोडकारान दोळ्यांचेर शस्त्रक्रिया करपाच्या आपरेशन थिएटराची म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
