राजधानी पणजेचेर परत फोंडकुलांचें राज्य
भांगरभूंय | प्रतिनिधी
पणजी, प्रतिनिधी: चवथी वेळार लोकांक त्रास जावचें न्हय देखून फोंडकुलां पुरोवपाचे केल्ले यत्न अपेशी थारल्यात. पणजी परत फोंडकुलांनी भरल्या. फाटल्या दोन दिसां सावन सेगीत पडपी पावसाक लागून फोंडकुलां खंय आनी रस्तो खंय हाचो सोद घेत लोकांक आपलीं वाहनां चलोवचीं पडटात. पणजे सांतीनेज जंक्शन, सांतीनेज चर्ची फुडलो रस्तो, शासकीय वसणुके मुखार, मधुबन र्सल, काकुलो माॅल ह्या वाठारांतल्यान वाहनां घेवन वचप धोक्याचें जालां. फोंडकुलांक लागून अपघात जावपाची शक्यताय वाडल्या.
फाटल्या दिसांनी चलपी स्मार्ट सिटीच्या कामाक लागून लोकांक बरेच त्रास सोंसचे पडिल्ले. शारांतले मुखेल रस्ते सोडल्यार भितरल्या सगळ्या रस्त्यांची अवस्था सामकी बाबत जाल्या. वता थंय फोंडकुलां पळोवपाक मेळटात. जी २० बसके पयलीं डांबरीकरण केल्लो दयानंद बांदोडकर रस्तो सध्या बरे अवस्थेंत आसा. पूण सेगीत पावस झडत रावल्यार हाचीय परिस्थिती इबाडपाची शक्यताय आसा.
पणजे बसस्टॅण्डा वयल्यान बशी भायर सरतात तो रस्तो तर सामको भिरांकूळ परिस्थितींत आसा. प्रत्येक बस हालत, धोलत भायर सरता. चड वेगान येत जाल्यार ती लंवडून पडटली, इतलीं थंय फोंडकुलां पडल्यांत. हे त्रास केन्ना सोंपतले हाची पणजेचे लोक सध्या वाट पळयतात. कारण फोंडकुलांचें रस्ते ही गोंय राज्याक सतावपी सासणाची समस्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
