भांगरभूंय | प्रतिनिधी
मुख्य अभियंत्याची शिटकावणी देखभाली कडेन आडनदर करपी अभियंत्यांचेर जातली कारवाय
भांगरभूंय । प्रतिनिधी
पणजी : रस्ते चडांत चड सुरक्षीत करपाच्या हेतान रस्त्या कुशीचे संरक्षक कठडे (क्रॅश बॅरीयर्स) नव्यान उबारपा सयत सध्याच्या संरक्षक कठड्यांची नेमान दुरूस्ती तशेंच देखभाल करपाचो निर्णय भौशीक बांधकाम खात्यान घेतला. हे विधीचें धोरण भौशीक बांधकाम खात्यान अधिसुचीत केलां. दुरूस्ती वा देखभाली कडेन आडनदर करपी अभियंत्यांचेर कारवाय करपाची शिटकावणी मुखेल अभियंत्यांनी दिल्या.
आपआपल्या वाठारांतल्या संरक्षक कठड्यांची तपासणी करून दुरूस्ती करपाची जापसालदारी त्या वाठारांतले कनिश्ट अभियंते आनी सहाय्यक अभियंत्यांची आसा.
राज्यांत अपघातांचें प्रमाण वाडत आसा. अपघात जावपाच्या कारणांमदीं धोकादायक रस्ते हें एक कारण आसा. म्हामार्गाच्या विस्तारा सयत रस्त्यांची दुरूस्ती खूबश्या प्रमाणांत जाल्या. संरक्षक कठड्यां कडेन (क्रॅश बॅरीयर) मात फावो तशें लक्ष दिवंक ना. रस्त्याच्या कुशीक देंगण वा चडाव आसलो जाल्यार संरक्षक कठडो आदार थारता. रातच्या वेळार संरक्षक कठड्याक लागून रस्त्याच्यो देगो कळपाक मजत जाता. खूबश्या वेळार संरक्षक कठड्याक लागून गाडी देंगणांत पडपा पसून वाटावपाची शक्यता चड आसता. वाडट्या अपघातांचे फाटभुंयेर संरक्षक कठड्या कडेन आडनदर करप परवडपा सारकें ना.
रस्तो सुरक्षेचे नदरेन सर्वोच्च न्यायालयान 26 नोव्हेंबर 2019 ह्या दिसा संरक्षक कठड्या विशीं धोरण निश्चीत करपाचे निर्देश दिल्यात. ह्या निर्देशाक पाळो दिवन सरकारान संरक्षक कठड्यांचे धोरण निश्चीत केलां. गोंयांत 6 हजार किलो मिटर रस्ते आसात. कांय रस्ते धोकादायक आसात. भौशीक बांधकाम खात्याच्या रस्त्यां विशींच्या मार्गदर्शक तत्वा प्रमाण जे सुवातेर संरक्षक कठड्यांची गरज आसा, थंय संरक्षक कठडे उबारपाक जाय. हे विशीं अभियंत्यांनी रस्त्यांची पळोवणी करून एस्टिमेट तयार करपाक जाय. एस्टिमेट तयार जाले उपरांत विभागा प्रमाण निविदा जारी जातल्यो. विभागां मदीं चार ते पाच कंत्राटदार नियुक्त जातले. कंत्राटदारां मार्फत संरक्षक कठड्यांची उबारणी जातली. दरेकी चार म्हयन्यांनी अभियंत्यांनी संरक्षक कठड्यांची पळोवणी करपाक जाय. पळोवणी करून अहवाल सादर करपाची तजवीज धोरणांत आसा. आसा त्या संरक्षक कठड्यां मदीं दुरूस्ती वा सुदारणा हे विशीं अहवाल सादर करप गरजेचो आसा. अहवाला प्रमाण संरक्षक कठड्यांची दुरूस्ती जातली. संरक्षक कठड्यांची लांबाय, उंचाय तशेंच तांत्रीक पद्दत हांचो तपशील धोरणांत जाहीर जाला. संरक्षक कठड्याचेर गाडी आदळ्ळी जाल्यार उण्यांत उणें लुकसाण जावपाक जाय तशेंच गाडयेक सुरक्षा मेळपाक जाय, अशें तरेन राखणे वणत आसपाक जाय, असो उल्लेख धोरणांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
