भांगरभूंय | प्रतिनिधी
पणजी, बातमीदार : विरोधी पक्ष फुडारी युरी आलेमाव हांणी राज्यपालांच्या भाशणाचेर उपकार प्रस्तावांत २३० दुरुस्त्यो मांडल्यात. हाचेर सोमार ५ आनी बुधवार ७ फेब्रुवारीक विधानसभेंत चर्चा जातली.
२३० दुरुस्त्यां मदीं वित्तीय वेवस्थापनांत सरकाराचें अपेस, कायदो आनी सुवेवस्था सारकी ना, वाडपी बेरोजगारी, पेटीएमकडेन सामंजस्य करार, कायद्याची अंमलबजावणी करपी प्राधिकरणांचे म्हायती बगर मरण आयिल्ल्या कुडीची शिमे पलतडीं येरादारी, म्हादय विवाद, पर्यावरणीय समस्या, प्रदूशण, भ्रष्टाचार अश्या गोंयां कडेन संबंदीत विवीध समस्यांचो आसपाव आसा.
आपत्ती वेवस्थापन प्राधिकरणाचे अपेस, खाणकाम परत सुरू जावचें न्हय, संजीवनी साखर कारखानो, भोमा आनी कुंकळ्ळेचो बायपास प्रस्न, घातकी कोयराचो विलो, कार्यावळींचेर जावपी नस्टो खर्च, स्मार्ट सिटी अशे आनीक कांय मुद्दे विरोधी पक्ष फुडार्यांनी आपल्या दुरुस्ती प्रस्तावांत मांडले.
युरी आलेमांव हांणी मांडिल्ल्या २४ अभिनंदन प्रस्तावांत उषा नायक हांच्या अभिनंदनाच्या प्रस्तावाचो आसपाव आसा. आपली धूव डॉ. गौतमी हिच्या लग्नाच्यो सगळ्यो विधी तिणें विधवा आसूनय करपाचें धाडस केलें. गोंयचे एके बायलेन उखलिल्लें तें एक अग्रगण्य पावल अशें युरी हांणी प्रस्तावांत म्हणलां. हेर परबीं दिवपी प्रस्तावांत राष्ट्रीय खेळांनी पदकां घेवपी विवीध खेळगडे तशेंच कलाकार, लेखक हांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
