भांगरभूंय | प्रतिनिधी
म्हापशें: शारांतल्या कांय शिक्षणीक संस्थां कडेन स्वताचें व्हड कॅम्पस नात. बांबोळे सारकें कुजिरा शाळा संकूल येवजण म्हापश्यां राबयल्यार ताचो फायदो शाराक जातलो. चड करून येरादारी कोंयडेचो प्रस्न उप्रासचो ना. सरकारान ह्या शाळा संकुलाचो विचार प्रशासकी पांवड्यार करचो अशें मत उपसभापती ज्योशुआ डिसोझा हांणी उक्तायलें.
शुक्रारा दत्तवाडी सेंट ब्रिटो हायस्कूल मैदानाची राखणे वणत परतून बांदपाच्या कामाची बुन्याद घाली ह्या वेळार डिसोझा उलयताले.
ह्या वेळार नगराध्यक्षा प्रिया मिशाळ, उपनगराध्यक्ष विराज फडके, भौशीक बांदकाम खात्याचे सहाय्यक अभियंते महेश शेट्ये, सेंट ब्रिटोचे प्राचार्य फा. सिमोन, उपप्राचार्य फा. आनंद आनी युवेट पेस हाजीर आशिल्ल्यो.
आमदार एलएडी येवजणे खाला हें काम हातांत घेतलां. हो परतून बांदपाचो प्रकल्प अदमाशेक 18 लाखांचो आसून 90 दिसां भितर हें काम पुराय जातलें. मुख्यमंत्री आनी भौशीक बांदकाम मंत्र्यांनी ह्या कामा खातीर सहकार्य केल्ले खातीर ज्योशुआ डिसोझा हांणी सगल्यांचे उपकार मानले.
म्हापशें शार हें एक मुखेल शिक्षीणक हब जावचें. हांगासरल्या सेंट ब्रिटो हायस्कूल, सेंट झेवियर कॉलेज, एसएफएक्स हायस्कूल, डीएमसी कॉलेज शिक्षणीक संस्थां कडेन स्वताचे मोटे कॅम्पस आसात. जाल्यार उरिल्ल्या शिक्षणीक संस्थां कडेन तशी स्थिती ना. ताका लागून कुजिरा शाळा संकुला सारकी येवजण म्हापशें शारांत राबयल्यार ती सगल्यां खातीर फायद्याची थारतली हाचेर डिसाझा हांणी परतून भर दिलो.
मजगतीं, फाटल्या वर्सा आनी अंदूंच्या पावसाळ्यांत ह्या राखणे वण्टीचो कांय भाग कोसळिल्लो. ताका लागून ह्या वण्टीच्या दुरुस्तीचो प्रस्ताव सेंट ब्रिटो शाळा वेवस्थापनान आमदार तशेंच उपसभापती डिसोझा हांचे कडेन मांडिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
