भांगरभूंय | प्रतिनिधी
‘भांगरभूंय’ न उजवाडायिल्ले खबरेची घेतली दखल
म्हापशें: नगरपालिकेन सरकारान निश्चीत केल्ल्या पालिका कचेरेच्या कारभाराच्या पद्दतीची अंमलबजावणी मंगळारा सावन सुरू केल्या. सोमारा उजवाडा आयिल्ले ‘भांगरभूंय’ चे खबरेची दखल घेवन पालिका अधिकाऱ्यांनी ही कामकाजाची पद्दत चालीक लावपाचे निर्देश कर्मचाऱ्यांक दिल्यात.
शार उदरगत खात्यान दर दिसा दनपारां 12 वरांचेर टपाल मुख्याधिकाऱ्यांक वचूंक जाय. मुख्याधिकाऱ्यांनी तें हातावेगळें करून 1 वरां मेरेन तें टपाल संबंदीत डिलींग हॅण्ड कर्मचाऱ्या कडेन पावूंक जाय. परतून सांजवेळा टपाल 4 वरांचेर मुख्याधिकाऱ्यां कडेन वचूंक जाय आनी 5 वरांचेर तें सगल्या डिलींग हॅण्डाक वितरीत जावंक जाय अशे निर्देश पालिका संचालकांक 2000 वर्सा दिल्ले.
पूण हे कार्यपद्दतीचो उपरांत विसर म्हापशें पालिके सयत राज्यांतल्या नगरपालिकांक पडिल्लो. हाचेर ‘भांगरभूंय’ न खबर उजवाडा हाडिल्ली. हाची दखल म्हापशें पालिकेचे मुख्याधिकारी चंद्रकांत शेटकार हांणी घेतली आनी मंगळारा सावन दर दिसा वयल्या नेमा प्रमाण टपाल लेखा तशेंच प्रशासकी अधिकारी हांकां जाल्यार तांचे गैरहाजिरेंत सदर टपाल पालिकेच्या मुखेल कारकुना कडेन सादर करपाचे निर्देश कर्मचाऱ्यांक दिले. ते प्रमाण तत्काळ ह्या नेमांची कार्यवाही केली.
गोंयच्या पालिका कर्मचाऱ्यांक प्रशासकी कारभार कळना. म्हयन्याचे म्हयने लोकांची कामां जायनात. फायली मेळनात. फायली आडावन दवरतात अशे तरेच्यो कागाळी शार उदरगत खात्या कडेन येताल्यो. हाची गंभीर दखल 2000 वर्सा तेन्नाचे शार उदरगत मंत्री दिगंबर कामत हांणी घेवन उंचेली बसका आपयिल्ली. शार उदरगत खात्याचे सचीव, पालिका संचालनालयाचे संचालक, सगले नगराध्यक्ष आनी मुख्याधिकारी हांचो हे बसकेंत आस्पाव आशिल्लो. दर दिसा कामकाजाची पद्दत हे बसकेंत थारावन तशे खर निर्देश संबंदीत पालिका मुख्याधिकारी आनी नगराध्यक्षांक पालिका संचालनालया वतीन दिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
