भांगरभूंय | प्रतिनिधी
म्हापशें: मोंतेगिरी, लिंगाभाट आनी गणेशपुरींतल्या चोरी प्रकरणांचो तपास लावपा खातीर म्हापशें पुलिसांनी पांच चवकशी पंगड तैनात केल्यात आनी तांचे वतीन तपास सुरू आसा. फाटल्या चार दिसांच्या काळांत ह्यो चोरयेच्यो घडणुको घडल्यात.
फाटले 21 वेर लिंगाभाट, पर्रा हांगासरल्या श्रीनागनाथ महादेव देवस्थानांत चोरयेची घडणूक घडिल्ली. अनवळख्या चोरांनी फंडपेटी फोडून 70 हजारांची रोख फारायिल्ली. हे चोरयेंतले तीन चोर सीसीटीव्हीच्या फुटेजींत बंदिस्त जाल्ले.
उपरांत त्याच दिसा दनपारां दिसा उजवाडा गणेशपुरी म्हापश्यां दोन बंगले फोडले. अनवळखी दुबावितांनी डॉ. स्वाती दिवकार हांच्या घरांतली 10 हजार रुपयांची रोख रक्कम फारायली. जाल्यार उमेश जोशी हांच्या घरांत चोरांच्या हाताक कांयच मेळ्ळें ना.
सोमारा 24 वेर सांजवेळा मोंतेगिरी हांगाच्या आंतोनेथ डिक्रुझ हांचो बंगलो चोरांनी फोडलो. कागाळदार डिक्रुझ जोडपें दोतोरागेर गेल्ले तेन्ना हो चोरयेचो प्रकार घडिल्लो. चोरांनी घरांतली रोख रक्कम आनी भांगर फारायिल्लें.
सेगीत जावपी चोरी करून चोरांनी पुलिसांची न्हीद खळयल्या. चारूय चोरी प्रकरणांचो तपास लावपा खातीर म्हापशें पुलिसांनी पांच पंगड तैनात करून ताचे वरवीं तपासकाम सुरू केलां.
चोरयेच्यो घडणुको घडिल्ल्या वाठारांतले सीसीटीव्ही फुटेज आनी हेर तपास तंत्रांचो वापर करून हे पंगड ह्या प्रकरणांची चवकशी करीत आसात. अजून ह्या पंगडांच्या हाताक ठोस अशे धागेदोरे लागिल्ले नात अशी म्हायती गोपां कडल्यान मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
