भांगरभूंय | प्रतिनिधी
म्हापशें : म्हापशेंच्या वीज कार्यालयाच्या तळ माळयेर वीज खात्यान एनी टायम पेमेंट मशीन (एटीपीएए) उबारलां. हाचे वरवीं गिरायकांक दिसाचीं तशेंच रातचींय वीज बिलां फारीक करपाक मेळटलीं. खात्यान म्हापशें, कळंगूट, पणजी आनी मडगांव ह्या चार वीज कार्यालयांनी हें मशीन उपलब्ध केलां.
वीज खात्याचे मुखेल अभियंते स्टीफन फर्नांडीस आनी टिजेएसबी सहकारी बँकेची वेवस्थापकीय संचालक शुभलक्ष्मी शिराली, गोंय क्षेत्रीय मुखली अरुण भट आनी वीज खात्याचे सहाय्यक अभियंते प्रदीप नार्वेकार हाजीर आशिल्ले.
आतां कार्यालयीन वेळा उपरांत तशेंच सुटयेच्या काळांत म्हळ्यार शेनवार आनी आयतारचेंय गिरायकांक बिलां फारीक करपाक मेळटलीं. टिजेएसबी सहकारी बँक लिमिटेडाच्या सहकार्यान वीज कार्यालयांनी हीं मशिनां बसयल्यांत. वर्साचे 365 दीस आनी 24 वरांय हें मशीन चालूच आसतलें, अशी म्हायती मुखेल वीज अभियंते स्टीफन फर्नांडीस हांणी दिली.
हें एटीपीएम मशीन शंभर, दोनशे, पांचशे, दोन हजार रूपया स्विकारता. ही पेमेंट प्रक्रिया येसस्वी जाले उपरांत गिरायकांक पावती मेळटली, अशेंय फर्नांडीस हांणी म्हणलें.
ज्येश्ठ लोक वीज बिलां भरपा खातीर रांकेंत रावतात. ह्या लोकां खातीर ह्या यंत्रांची मजत जातली. ह्या मशिनांची योग्य म्हायती दिवपाक कार्यालयाचे कर्मचारी थंय हाजीर आसतले. ते लोकांक बील भरपाक मजत करतले, अशें फर्नांडीस हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
