भांगरभूंय | प्रतिनिधी
म्हापशें ः हांगाच्या टॅक्सी स्टँडा मुखार आशिल्ल्या पोरण्यां आंतरराज्य बस स्टेशनाचेर उब्यो आशिल्ल्यो रेंट अ बायक आनी रेंट अ कार गाडयो काडपाक म्हापशें येरादारी पुलीस विभागान ह्या गाडयांच्या मालकांक सांगलां. ही म्हापशेंची भौशीक पार्किंग सुवात. पूण ती रेंट अ बायक आनी रेंट अ कार ह्या पर्यटक गाडयांनी आडायल्या. देखून सामान्य मोटार चालकांक हांगां आपलीं वाहनां उबीं करपा खातीर खूब त्रास सोंसचे पडटात.
हाचे आदीं म्हापशें येरादारी पुलीस खात्यान पालिकेक पत्र धाडून ही सुवात सामान्य लोकां खातीर पे पार्किंग सुवात म्हूण नोंद करपाची सुचोवणी केल्ली. ते प्रमाण पालिका मंडळान ही सुवात पे पार्किंग म्हणून राखून दवरिल्ली. पूण अजून ताची अंमलबजावणी जावंक ना.
म्हापशें येरादारी पुलिसांनी हे सुवातेर पळोवणी केली. तेन्ना ह्या भौशीक पार्किंग सुवातेर व्हड प्रमाणांत वेपारी वाहनां उबीं आशिल्लीं अशें दिसून आयलें.
ह्या भाड्यान घेतिल्ल्या गाडयांच्या मालकांक चड काळ गाडयो उबीं करच्यो न्हय आनी जागो निवळ करपाची सुचोवणी दिल्या. कारण ह्या मालकांक दिल्ले परवानगे प्रमाण तें न्याय्य ना.
ही सुवात भौशीक पार्किंग आशिल्ल्यान वेपारी वाहनां थंय उबीं करपाक मेळनात. संबंदीत वाहन मालकांक तांची पर्यायी वेवस्था करपाक वेळ दिला आनी सोमारा सावन ह्या वाहनां आड कायदेशीर कारवाय जातली अशें येरादारी पुलीस अधिकाऱ्यांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
