म्हादय अभयारण्य ‘टायगर रिझर्व्ह’ म्हूण घोशित करचें
भांगरभूंय | प्रतिनिधी
उच्च न्यायालयाचे गोंय सरकाराक निर्देश
भांगरभूंय । प्रतिनिधी
पणजी : रानां जीव म्हामंडळान गोंयांत ‘टायगर रिझर्व्ह वाठार’ नाकाच अशी भुमिका घेवन १० दीस जाता थंय आसा, आतां मुंबय उच्च न्यायालयान गोंय सरकाराचे कान तोंपल्यात. आयज उच्च न्यायालयान फुडल्या तीन म्हयन्यां भितर म्हादय अभयारण्य आनी सरभोंवतणचो वाठार हो ‘टायगर रिझर्व्ह वाठार’ म्हूण घोशित करपाचे निर्देश दिल्यात, अशी म्हायती अॅड. नॉर्मा आल्वारीस हांणी दिली.
मजगतीं, आमकां अजून न्यायालयाच्या आदेशाची काॅपी मेळूंक ना, पूण आमी उच्च न्यायालयाच्या ह्या निर्णयाक सर्वोच्च न्यायालयांत आव्हान दितले, अशें वनमंत्री विश्वजीत राणे हांणी स्पश्ट केलां.
गोंय फावंडेशनान उच्च न्यायालयांत, म्हादय अभयारण्य आनी आशिकुशीकचो वाठार ‘टायगर रिझर्व्ह’ म्हणून अधिसुचीत करचे खातीर एक याचिका दाखल केल्ली. हाचेर उच्च न्यायालयान सोमारा निवाडो दिला, अशें अॅड. आल्वारीस हांणी सांगलें.
फुडल्या तीन म्हयन्यां भितर म्हादय अभयारण्य आनी आशिकुशीकचो वाठार ‘टायगर रिझर्व्ह’ म्हूण अधिसुचीत करचो. तशेंच वागांचे सुरक्षितताये खातीर आराखडो तयार करचो. प्राधिकरणानय हाका रोखडीच मान्यताय दिवची, अशे निर्देश उच्च न्यायालयान सरकाराक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
