भांगरभूंय | प्रतिनिधी
फोंडें, प्रतिनिधी : पळसकटो- मोल्यां ट्रक आनी स्कुटर हांचे मदीं काल सांजवेळार जाल्ल्या अपघातांत शिवकुमार सिंग (२३, मध्य प्रदेश) हाका मरण आयिल्लें जाल्यार आशिश साहू (२५, मध्य प्रदेश) हो गंभीर जखमी जाल्लो. ह्या अपघाता उपरांत ट्रका सयत चालकान पळ काडिल्लो. अपघाता वेळार ट्रक चलोवपी व्यक्ती उजो पालोवपी दळाचो कर्मचारी आशिल्ल्यान ताका ह्या प्रकरणांतल्यान भायर काडपा खातीर राजकी मनशां कडल्यान रातीं उसरां मेरेन बरेच यत्न सुरू आशिल्ले, अशें कांय जाणांनी सांगलें. मात, कुळें पुलिसांनी काल उसरां नवनाथ झोरे ह्या ट्रक चालकाक अटक केली. तो उजो पालोवपी दळाचो चालक.
थळाव्या लोकांनी दिल्ले म्हायती प्रमाण, जीए ०५ ई ३२५२ क्रमांकाची स्कुटर मोलें सावन फोंड्यां वताली. सांजवेळा ५ वरांच्या सुमाराक पळसकटो- मोलें जंक्शना कुशीक अचकीत विरुद्ध दिशेन येवपी ट्रकाचो धपको स्कुटरीक बसलो. हातूंत स्कुटर चालकाक जाग्यारूच मरण आयलें. जाल्यार स्कुटरीचे फाटल्यान बशिल्लो गंभीर जखमी जालो. जखमीक १०८ एम्बुलन्सीन सगल्यांत पयलीं पिळयां मुळाव्या भलायकी केंद्रांत दाखल केलो. उपरांत ताका गोमॅकॉंत धाडून दिलो. अपघाता उपरांत ट्रक चालकान ट्रका सयत पळ काडिल्लो. पूण लोकांनी ट्रक वळखल्ल्यान तो ३०० मिटर अंतराचेर पार्क करून चालकान पळ काडिल्लो. ट्रकचालक झोरे हाका रातीं उसरां कुळें पुलिसांनी अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
