भांगरभूंय | प्रतिनिधी
पेडणें : दर्यादेगेवेल्या वाठारांत पर्यटन वेवसायाक आजून सुरवात जावंक ना. पूण ऑक्टोबरांत सुरू जाल्लो पर्यटन वेवसाय अजूनय विठ्ठलदास वाडो- मोरजी दर्यादेगेच्या खाजगी जमनींतलो रेस्टॉरंट वेवसाय व्हड प्रमाणांत चालूच आसा. आनी तातूंत भर म्हणल्यार पावसाच्या दिसांनी येवपी पर्यटकांक त्रास दिवपाचें काम सध्या कपडे विकपी लमाणीं करतात.
दर्यादेगेवेल्या वाठारांनी बेकायदेशीर वेवसाय करपी आनी कपडे विकपी बिगर गोंयकारां आड खर कारवाय करतले अशी शिटकावणी पर्यटन मंत्री रोहन खंवटे हांणी दिल्या. सरकार आनी पर्यटन खातें तांचेर कसली कारवाय करतले हाचेर सगळ्यांचें सध्या लक्ष आसा.
दर्या देगांचेर पर्यटन हंगामांत नोव्हेंबर ते मे म्हयनो मेरेन व्हडा प्रमाणात बिगर गोंयकार तशेंच भोंवपी विक्रेते, कपडे वाडले, विवीध सामान विकपी विक्रेते, आयस्क्रीम गाडी घेवन भोंवपी, मसाज करपी दादले- बायलो ऑक्टोबरांत हांगा येतात. मे म्हयन्यां मेरेन हो वेवसाय चालूच आसता. उपरांत तो बंद जाता. मागीर पावसाळी पर्यटनाक सुरवात जाता. पूण विठ्ठलदास वाडो- मोरजी दर्यादेग वाठारांत भोंवताडो मारल्यार ऑक्टोबर सावन सुरू जाल्लो पर्यटन वेवसाय आजूनय तसोच चालू आसा.
जे पर्यटक देश विदेशांतल्यान येतात तांकां विसव घेवपाची वेवस्था वेवसायिकांनी केल्ली आसता. ताचो लाव घेवन आजूय लमाणी कपडे विक्रेते ह्या दर्यादेगेर भोंवतना दिसतात. कांय लमाणी कपडे विक्रेते रस्त्या कुशीक अतिक्रमण करून दुकानां बांदतात. त्या दुकानांक कितलें गिरायक जाता हो संशोधनाचो विशय. पूण लमाणीं बायलां जंय पर्यटक हाजीर आसतात थंय तांकां वचून त्रास करपाचें काम करतात, अशें चित्र दिसता.
ह्या भटक्या कपडे विक्रेत्यांचेर पर्यटन खात्यान, थळाव्या पुलिसांनी खर कारवाय करची अशी मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
