भांगरभूंय | प्रतिनिधी
म्हापशें, प्रतिनिधी ः मोपाच्या मनोहर आंतरराष्ट्रीय विमानतळाच्या आवारांत दवरिल्लें 5 लाख 81 हजार रुपयांचें कावल (स्क्रॅप) चोरिल्ल्याची कागाळ कंत्राटदार पंकज पहरी (हरमल) हांणी पेडणें पुलिशेंत केल्ली. उपरांत पुलिसांनी पहरी हांचो कामगार समीर अब्दुल हलीमशहा (कोलवाळ) हाका अटक करुन चोरयेचो म्हाल जप्त केलो.
पहरी हे मोपा विमानतळाचे कंत्राटदार. तांणी बऱ्या दर्जाचे कावल दुसऱ्या कंत्राटदाराक दिवपाक विमानतळ वाठारांत दवरिल्लें. ही संद घेवन दुबावीत समीरान टेम्पो हाडून ते चोरी केलें. समीर पंकजाच्या हाताखाला काम करता. 13 ते 16 जानेवारी ह्या काळांत ताणें तें चोरिल्ल्याची कागाळ पेडणें पुलिशेंत दाखल जातकच पुलिसांनी समीराक धरून ताची चवकशी केली. उपरांत म्हाल जप्त करून ताका अटक केली. पुलीस निरिक्षक नारायण चिमुलकार हांच्या मार्गदर्शना खाला फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
