भांगरभूंय | प्रतिनिधी
मोटार धनयाक वॉरंटूय जारी; पुलीस स्टेशन हल्लो प्रकरण
मडगांव: पणजी पुलीस स्टेशनार 2008 वर्सा जाल्ल्या हल्लो प्रकरणांत तेन्नाचे पुलीस निरिक्षक सुदेश नायक हांणी हल्ल्या वेळार वापरिल्ले मोटारी सयत आनीक एका दुबाविताची वळख पटयली. तीन मोटारीं मदलो एकलो आलेक्स आल्मेदा ह्या मोटार धनयाक नोटिसे उपरांतूय गाडी सादर करूंक नाशिल्ल्यान न्यायालयान ताचो धा लाखांचो हमी रकमेचो बाँड जप्त करतनाच अटकेचो वॉरंट जारी केलां.
मंत्री बाबूश मोंसेरात हांचे सयत हेरां आड पणजी पुलीस स्टेशना वयल्या हल्लो प्रकरणाची सुनावणी दक्षीण गोंय जिल्हो विशेश न्यायालयांत सुरू आसा. हाचे आदींचे सुनावणे वेळार बाबूश हांकां 30 सप्टेंबर मेरेन सुनावणेक गैरहाजीर रावपाक मेकळीक दिल्या. जाल्यार जेनिफर मोंसेरात हांचो अर्ज भायरायला.
बाबूश मोंसेरात आनी तांच्या समर्थकांनी 19 फेब्रुवारी 2008 दिसा पणजी पुलीस स्टेशनार हल्लो केल्ल्या प्रकरणांत हाचे पयलींच्या सुनावणे वेळार तेन्नाचे पुलीस निरिक्षक सुदेश नायक हांची साक्ष नोंद करपाचे काम सुरू आसा. बाबूश हांच्या फुडारपणा खाला जमाव पुलीस स्टेशनार चाल करून आयिल्लो आनी बाबूश हांणीच ताका भडकायिल्ल्याचें हाचे आदीं नायक हांणी सांगिल्लें. हल्लो प्रकरणांतल्या आंदोलकांनी वापरिल्ले फातर, बॅनर, मोटारी आनी हेर पुराव्यां सयत आतां मेरेन बाबूश मोंसेरात, जेनिफर मोंसेरात, आदले म्हापौर उदय मडकयकार, दयानंद कारापूरकार, कारोलिना पो हांचे सयत आनीक सात जाणांची वळख पटयल्या. हे सुनावणे वेळार आनीक एक दुबावीत हफिझुल्ला खान हाची वळख पटयली.
शुक्रारा जाल्ले सुनावणे वेळार दुबावितां मदीं 22 जाण हाजीर आशिल्ले. जाल्यार बाबूश, जेनिफर मोंसेरात हांचे सयत 11 जाण गैरहाजीर आशिल्ले. हाचे आदीं नोटीस धाडून हल्लो प्रकरणांतल्या मोटारींक न्यायालया मुखार सादर करपाक सांगिल्लें. ते प्रमाण दयानंद गायक हांणी झेन गाडी सादर केली आनी सुदेश नायक हांणी ताची वळख पटयली. दुसरो मोटार धनी फ्रान्सिस्को रॉड्रिगीश हांकां मरण आयिल्ल्यान नोटीस फाटीं घेतली.
जाल्यार तिरो मोटारीचो धनी आलेक्स आल्मेदा हाका नोटीस मेळ्ळे उपरांतूय ताणें गाडी सादर करूंक नाशिल्ल्यान 10 लाखांचो बाँड सुरक्षा हमी म्हणून दिल्लो तो न्यायालयान जप्त केला. तशेंच फुडले सुनावणेक मोटारी सयत हाजीर रावपा खातीर अटक वॉरंट जारी करपाचे आदेश न्यायालयान दिल्यात.
तेन्नाचे पुलीस निरिक्षक सुदेश नायक हांचे कडल्यान दुबावितांची वळख पटोवपाची प्रक्रिया फुडले सुनावणे वेळार सुरूच उरतली. ह्या प्रकरणांत 4 ऑगस्ट दिसा दनपारां अडेज वरांचेर फुडली सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
