भांगरभूंय | प्रतिनिधी
दुबावीत अल्बाझ उर्फ अफझलाक अटक
म्हापशें: हडफड्यां पिकनिके खातीर गेल्ल्या 18 वर्सां पिरायेचे तरणाटेचेर तिच्या इश्टिणीच्याच मोग्यान लिंगीक अत्याचार केल्ल्याची घडणूक घडली. ह्या प्रकरणांत दुबावीत आरोपी अल्बाझ उर्फ अफझल नूर अहमद खान (21, रा. कामुर्ली, मूळ कर्नाटक) हाका हणजूण पुलिसांनी अटक केली. दुबावीत आरोपी हो पर्यटक टॅक्सी चालक आसा.
हो प्रकार आयतारा 30 वेर सांजवेळा 4.45 ते 5.50 ह्या वरांचेर घडलो. कागाळदार तरणाटी आपल्या एका इश्टिणी सयत हडफड्यां पिकनिके खातीर गेल्ली. थंयच्या एका अपार्टमेंटवजा रिसॉर्टाच्या फ्लॅटांत त्यो दोगूय राबित्याक आशिल्ल्यो. उपरांत दुबावीत आरोपी थंय आयलो. तांणी थंय पार्टी केली.
उपरांत दुबावितान आपले मोगिकेक कांय वस्तू हाडपा खातीर भायर दुकानांत धाडून दिलें. ती फ्लॅटांतल्यान भायर सरतकूच दुबावीत पिडितेच्या बॅडरुमांत गेलो आनी तिचेर लिंगीक अत्याचार केले.
दुबाविताचे तावडेंतल्यान पिडीत तरणाटेन आपली सुटका केली आनी घडणूक थळा वयल्यान पळ काडलो. आपले बरोबर घडिल्लो प्रकार मंगळारा तिणें आपले भयणीक सांगलो. उपरांत पिडितेन हणजूण पुलीस स्टेशनार रितसर कागाळ दाखल केली.
हे कागाळीच्या आदाराचेर पुलिसांनी दुबावीत आरोपी अल्बाझ उर्फ अफझल हाका धरलो आनी ताचे आड भादंसंच्या 376 कलमा खाला गुन्यांव नोंद करून अटक केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
