भांगरभूंय | प्रतिनिधी
वाळपय ः ‘मेरी मिट्टी, मेरा देश’ ह्या उपक्रमांतल्यान सत्तरी तालुक्याच्या सगळ्या पंचायतींक देशाची सेवा करपाची संद मेळ्ळ्या. ह्या उपक्रमा खाला कलश यात्रा कार्यावळीक बरो प्रतिसाद मेळ्ळा. शुक्रारा वाळपय मिरवणूक काडून हें कलाक्षेत्र वाळपय गट उदरगत अधिकाऱ्याच्या कार्यालयां मेरेन गेलें, उपरांत सगळ्या कलशांतली माती थंयच्या कलशांनी घातली. हो कलश नेहरू युवा केंद्रा कडेन दितले आनी ते उपरांत तो दिल्ली धाडटले. छत्रपती शिवाजी महाराज पालिका उद्यान सावन कलश यात्रा सुरू जाली. सगल्या पंचायतींनी हे कार्यावळीत वांटो घेतिल्लो. सरपंचांनी कलश घेवन मिरवणुकेंत वांटो घेतलो. वाळपय गट उदरगत अधिकारी सूर्याजीराव राणे सरदेसाय हांणी पंचायतींचे उपकार मानले.
देशा खातीर जीव दिवपी स्वातंत्र्य झुजाऱ्यांक लागून आनी धाडसी जवानांक लागूनच आमकां संरक्षणाची धाल मेळ्ळ्या. देखून सगळ्यांक मान दिवप म्हत्वाचें. हे कार्यावळींतल्यान तांकां श्रद्धांजली दिवपाची बरी संद मेळ्ळ्या. तिचो लाव घेवचो. तशेंच ‘हर घर तिरंगा’ उपक्रम सत्तरी तालुक्यांतल्या प्रत्येक घराचेर तिरंगो उबारपा खातीर आयोजीत केला. ताका व्हडलो प्रतिसाद मेळटलो, अशी आस्त गट उदरगत अधिकाऱ्यांनी उक्तायल्या.
केरी सरपंच दीक्षा गांवस, पर्ये सरपंच रती गांवकार, माऊस सरपंच सोमनाथ काळे, ठाणे सरपंच सरिता गांवकार, नगरगांव सरपंच संध्या खाडीलकार, सरपंच उज्वला गांवकार, खोतोडा सरपंच नामदेव राणे, गुळेली सरपंच नितेश गावडे आनी नगरगांव जिल्हो पंचायत वांगडी राजश्री काळे हांणी हे कलश यात्रेत वांटो घेतिल्लो. तेच प्रमाण पंचायतींचे कर्मचारी, पंच, उपसरपंच, वाळपय गट उदरगत कार्यालयाच्या अधिकाऱ्यांनीय वांटो घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
