भांगरभूंय | प्रतिनिधी
-उर्जा सुरक्षा, नेट झिरो सचीव म्हूण बडटी
लंडनः ब्रिटनचे प्रधानमंत्री ऋषी सुनक हांच्या लागीचें सहकारी क्लेअर कुतिन्हो हांचो बिरेस्तारा कॅबिनेटांत आस्पाव केला. उर्जा सुरक्षा आनी नेट झिरो सचीव म्हूण तांकां बडटी मेळ्ळ्या. 38 वर्सां पिरायेची कुतिन्हो ह्यो सुनक मंत्रीमंडळांतले गृहसचीव सुएला ब्रेव्हरमन हांचे उपरांतचे दुसरे मूळ गोंयकार आशिल्ले मंत्री जाल्यात.
रशिया – युक्रेन संघर्शाचे फाटभुंयेर ऊर्जा खर्चांत वाड जायत आशिल्ल्यान तांचे मुखार कठीण आव्हान आसतलें. क्लेअर हांणी स्वताक ऊर्जा सुरक्षिततेची राखण करपाक आनी खर्चाच्या संकटा कडेन झुजपी कुटुंबा खातीर बिलां उणी करपाक बांदील आशिल्ल्याचे सांगलें.
तांच्या पयल्या कॅबिनेट भुमिकेंत, बेन वॉलेसच्या राजिनाम्या उपरांत संरक्षण सचीवपदार बडटी मेळ्ळे उपरांत कुतिन्हो हांणी ग्रँट शॅप्सची सुवात घेतली.सुनक हांचे प्रमाण, यूकेंत जल्मल्ल्या कुतिन्हो राष्ट्रीय भलायकी सेवा (एनएचएस) कडेन जोडिल्ल्या कुटुंबांत वाडल्यो आनी राजकारणांत येवपा पयलीं गुंतवणूक बँकींग क्षेत्रांत काम केलां.
ऑक्सफर्ड युनिव्हर्सिटींतल्यान मॅथ्स आनी फिलॉसॉफींत पदव्युत्तर पदवी घेतिल्ल्या प्रो-ब्रेक्झिटरची लोकांची सेवा करपाचो सोपूत घेवन 2019 त ईस्ट सरे, दक्षीण पूर्व इंग्लंडा खातीर संसद वांगडी म्हूण कुतिन्हो हांची निवड जाली.
ऊर्जा सुरक्षा आनी नेट झिरो खातीर राज्य सचीव म्हूण नेमणूक केल्ले खातीर आपणाक खोस जाता. हांव ऊर्जा सुरक्षिततायेची राखण करपाक, कुटुंबां खातीर बिलां उणीं करपाक आनी नितळ, सवाय, घरगुती ऊर्जा तयार करपा खातीर प्रधानमंत्री सुनक हांचे वांगडा काम करतली, अशें कुतिन्हो हांणी ट्विट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
