भांगरभूंय | प्रतिनिधी
पणजी, प्रतिनिधी : आयआयटी खातीर सांग्यार 10 लाख चौखण मिटर जमीन नव्यान संपादित केल्ल्या. आयआयटी ही सांग्यारुच जातली. मुख्यमंत्री डॉ. प्रमोद सावंत म्हयन्यां भराच्या काळांत हे विशीं अधिकृत घोषणा करतले, अशे पुराभिलेख मंत्री सुभाष फळदेसाय हांणी सांगलें.
आतांच बुन्यादी फातर बसोवपाची तारीख सांगप शक्य जावचें ना. तरी आयआयटी कॅम्पस उबारपा विशींची प्रक्रिया सुरू जातली. वेंचून काडिल्लो नवो जागो योग्य आसा, अशें फळदेसाय हांणी सांगलें.
हाचे पयलीं सांग्यार एका जाग्याक लोकांनी विरोध केल्लो. जाग्याचें पुलीस संरक्षणांत सर्वेक्षण सुरू जाल्लें. लोकांचो विरोध जालो म्हूण पयलींच्या जाग्याचेर आयआयटी उबारपाचो प्रस्ताव रद्द जावंक ना. पुराय जाग्या मदलो 4 लाख चौखण मीटर जागो दोंगराळ आशिल्लो. हाका लागून केंद्रीय समितीन जागो अयोग्य थारायलो. नव्या जाग्याची निवड जावन तो सरकाराच्या ताब्यात आसा. जाग्या विशी अधिकृत घोशणा मुख्यमंत्री डॉ. सावंत करतले. अधिकृत घोषणा जाले उपरांत हेर प्रक्रियेक गती मेळटली, अशे मंत्री फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
