मासीक पाळये वेळार व्यायाम करप फायद्याचें?

भांगरभूंय | प्रतिनिधी

नवी दिल्ली ः व्यायाम करप भलायके खातीर गरजेचें. ताका लागून खुबशीं दुयेंसां आमच्या आंगांक लागू जायनात. दोतोर दिसाक 15 मिनटां तरी व्यायाम करपाचो सल्लो दितात. पूण, मासीक पाळये वेळार हलको वर्कआवट करपाक शकता, अशें ते सांगतात.

मासीक पाळये मजगतीं चडश्यो बायलो व्यायाम करिनात. जर तिका कसलेच दुयेंस नासल्यार ती ह्या काळांत व्यायाम करपाक शकता. व्यायामाचो फकत कुडीकूच फायदो जाता.

कसले तरेचे व्यायाम?

हे विशीं स्त्रीरोग तज्ञ म्हणटात, मासीक पाळये वेळार व्यायाम करूं येता, पूण ताची तिव्रताय सामकी उणी आसूंक जाय. तशेंच दर दिसा व्यायाम करपाची गरज ना. एक दीस केन्नाय योग करूं येता.

मासीक पाळयेच्या काळांत कुडींत जायते बदल जातात, ते व्यायामाक लागून उणे जावंक शकतात. व्यायाम केल्यार कुडींतल्या फील- गुड हार्मोनांची पातळी वाडटा. हाका लागून मूड सुदारता आनी मानसीक ताण उणो जाता. पूण ह्या काळांत तुमी सहज करपाक शकतात तेच व्यायाम करचे. मासीक पाळयेच्या पयल्या दिसा व्यायाम करप योग्य न्हय.

ल्हव ल्हव चलप आनी उण्यांत उणें 10 ते 15 मिनटां चलप. वांगडा ल्हव व्यायामूय करूं येता. पूण मासीक पाळयेच्या काळांत पोटांत चड दुखूंक लागल्यार व्यायाम करचो न्हय. अशे स्थितींत दोतोराचो सल्लो घेवप गरजेचें आसता. चड वेळ व्यायाम करचो न्हय. अर्द्यां वरांत तुमची वर्कआउट पुराय करची. दोतोराच्या सल्ल्या प्रमाण व्यायाम करचो. स्वताच केन्नाच खर व्यायाम करचो न्हय. म्हणल्यार वजन उखलप बी. तशें केल्यार हानीकारक थारूंक शकता.