भांगरभूंय | प्रतिनिधी
सरपंचपद गेलें तरी हरकत ना; पेडणें पुलीस स्टेशनार निवेदन सादर
पेडणें: मांद्रें पंचायत वाठारांत कसलेच तरेचो जुगार जावंक दिवचो ना. जुगारा आड पेडणें पुलीस स्टेशनार सरपंच ह्या नात्यान आपणें निवेदन सादर केलां. आतां पेडणें पुलिसांनी मांद्रें पंचायत वाठारांत खंय खंय जुगार सुरू आसात तें पळोवन तो बंद करचो. हाचे मुखार मांद्रें पंचायत वाठारांत जुगाराक थारो दिवचे नात. वेळ प्रसंगार आपलें सरपंचपद व्हगडावपाची वेळ आयली जाल्यार लेगीत ताचे म्हाका पडून गेल्लें ना. पूण जुगार मांद्रें पंचायत वाठारांत नाकाच अशी ठाम भुमिका आनी शिटकावणी मांद्रेंचे सरपंच अॅड. अमीत सावंत हांणी दिल्या.
मांद्रें मतदारसंघांत व्हड प्रमाणांत जुगार चलता. जाग्याजाग्यांनी जुगारा बरोबर मटकोय चलता. कांय मटकेकार बस स्टॉपार बसून मटको घेतना दिसून येतात. ताका लागून एखाद्रो प्रवासी बशी खातीर थंय उबो रावत जाल्यार ताका रावंक मेळना.
सरपंच अमीत सावंत हांणी म्हायती दितना सांगलें, आपणें सरपंच ह्या नात्यान पेडणें पुलिशेंत लेखी निवेदन सादर केलां. मांद्रें गांवांत जुगार चालू आसत जाल्यार तो संबंदीत फांट्यान रोखड्या रोखडो बंद करचो. खूबशा गांवांतले नागरिकांच्यो आनी खासा बायलांच्यो कागाळी म्हजे कडेन आयल्यात. ताका लागून आपल्याक हें पावल उबारचें पडलें अशें तांणी सांगलें.
निवेदन दिवपा फाटलें मुखेल कारण म्हणल्यार बायलांच्यो ह्या जुगारा विशीं कागाळी आसात. अमूक कडेन जुगार चालू आसा, इतलेंच न्हय तर पुराय पंचायत वाठारांत जुगार चालू आसत जाल्यार तो पूर्णपणान बंद करचो अशें सावंत हांणी म्हणलें.
मजगतीं, पेडणें मतदारसंघाचे आमदार आसतना राजेंद्र आर्लेंकार हांणी जुगार बंद केल्लो. तेच फाटभुंयेर आमदार आनी मंत्री राजेंद्र आर्लेंकार हांकां हार स्विकारची पडली. तेच पद्दतीन जर मांदऱ्यां जुगार चालू आसत जाल्यार तो बंद करपा खातीर आपले यत्न आसतले. आनी तांणी थारायत की फुडले वेंचणुकेंत म्हाका वेंचून हाडप ना जाल्यार ताची म्हाका परवा ना.
पेडणेंचे पुलीस निरिक्षक सचीन लोकरे हे कार्यक्षम अधिकारी आसात. तांणी आतां कार्यवाही करची अशी मागणी अॅड. अमीत सावंत हांणी केली. मुख्यमंत्री डॉ. प्रमोद सावंत हांणी लेगीत गॅम्बलिंगा आड खर पावलां उबारतले अशें जाहीर केल्लें. ताकाय आपूण येवकार दितां अशें अॅड. अमीत सावंत हांणी म्हणलें
आदले मुख्यमंत्री सर्गेस्त मनोहर पर्रीकार हांणी फुडाकार घेवन बायणा वस्ती कशे पद्दतीन बंद केली हाचें ताजें उदाहरण आसा. आतां मांद्रें पंचायत वाठारांत पर्यायान हेर वाठारांतूय गॅम्बलिंगा आड फक्त मुख्यमंत्री डॉ. प्रमोद सावंत हेच योग्य पद्दतीन पावलां उबारूंक शकतात असो विस्वास अमीत सावंत हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
